நடிகர் விஜய், நடிகைகள் பூஜா ஹெக்டே, மமிதா பைஜூ உள்ளிட்டோர் நடித்துள்ள ‘ஜனநாயகன்’ திரைப்படத்துக்கு தணிக்கை சான்றிதழ் வழங்க மறுத்து, அந்தப் படத்தை மறுஆய்வு குழுவுக்கு அனுப்பிய மத்திய திரைப்பட தணிக்கை வாரியத்தின் நடவடிக்கையை எதிர்த்து தொடரப்பட்ட மேல்முறையீட்டு மனுவை உச்ச நீதிமன்றம் தள்ளுபடி செய்துள்ளது.
இந்த வழக்கில், தயாரிப்பாளர் தரப்பு சென்னை உயர்நீதிமன்ற உத்தரவை எதிர்த்து உச்ச நீதிமன்றத்தை அணுகியிருந்தது. ஆனால், இந்த விவகாரத்தில் தலையிட மறுத்த உச்ச நீதிமன்றம், வழக்கை சென்னை உயர்நீதிமன்றமே விசாரித்து முடிக்க வேண்டும் எனத் தெரிவித்துள்ளது.
மேலும், இந்த விவகாரம் தொடர்பான விசாரணையை விரைவாக முடிக்குமாறு சென்னை உயர்நீதிமன்றத்துக்கு உச்ச நீதிமன்றம் அறிவுறுத்தியுள்ளது. இதனால், ‘ஜனநாயகன்’ படத்தின் வெளியீடு தொடர்பான முடிவு இன்னும் தெளிவாகவில்லை.
தணிக்கை சான்றிதழ் வழங்கும் விவகாரத்தில் நீதிமன்றங்களின் தீர்ப்பு முக்கியத்துவம் பெறும் நிலையில், இந்த வழக்கு திரைப்பட உலகிலும் அரசியல் வட்டாரங்களிலும் கவனம் ஈர்த்துள்ளது.
