புதுக்கோட்டை மாவட்டத்தில், ஒரு பழங்குடி சமூகத்தின் வரலாற்றில் புதிய அத்தியாயம் எழுதப்பட்டுள்ளது. இதுவரை பத்தாம் வகுப்பைத் தாண்டாத அந்த சமூகத்திலிருந்து, முதன்முறையாக இரண்டு பெண் குழந்தைகள் பத்தாம் வகுப்பு தேர்ச்சி பெற்று கல்லூரிக்கு செல்லும் நிலையில், அந்த கிராமமே திருவிழா போல களைகட்டியுள்ளது. வாத்திய முழக்கங்கள், ஊர்வலம், ஆனந்தக் கண்ணீர் என அந்தப் பகுதி முழுவதும் மகிழ்ச்சியின் ஒலியால் நிறைந்தது.   புதுக்கோட்டையிலிருந்து சுமார் 5 கிலோமீட்டர் தொலைவில், சிப்காட் அருகே அமைந்துள்ள காமராஜ் நகரில் இந்த நெகிழ்ச்சியான சம்பவம் நடந்துள்ளது. இங்கு இந்து ஆதியன் பழங்குடி சமூகத்தைச் சேர்ந்த 76 குடும்பங்கள் வசித்து வருகின்றனர். இந்த சமூகத்தில் இதுவரை எந்த பெண் குழந்தையும் பத்தாம் வகுப்பைத் தாண்டி உயர்கல்விக்கு செல்லாத நிலையில், லட்சுமி மற்றும் தமிழ்ச்செல்வி என்ற இரண்டு மாணவிகள் அந்தத் தடையை உடைத்துள்ளனர்.   வறுமை, சமூகப் பின்தங்குதல், சாதிச்சான்றிதழ் இல்லாமை போன்ற பல தடைகளை எதிர்கொண்டே இந்த மாணவிகள் கல்விப் பயணத்தை தொடர்ந்துள்ளனர். குறிப்பாக, சாதிச்சான்றிதழ் இல்லாததே இவர்களின் உயர்கல்விக்கு மிகப் பெரிய தடையாக இருந்தது. இருப்பினும், ‘எய்டு இந்தியா’ அமைப்பின் முயற்சி மற்றும் ஆதரவால், லட்சுமி மற்றும் தமிழ்ச்செல்வி இருவரும் தற்போது புதுக்கோட்டையில் உள்ள ஒரு தனியார் கல்லூரியில் டிப்ளமோ நர்சிங் படிப்பில் சேர்ந்து உள்ளனர்.   இந்த சமூகத்தில் ஆண்களில் தமிழரசன் என்ற ஒரே மாணவர் மட்டும், தன்னார்வ தொண்டு அமைப்பின் உதவியுடன் எம்.ஏ. படித்து வருகிறார். கல்வி குறித்து விழிப்புணர்வு இருந்தாலும், தேவையான ஆவணங்கள் இல்லாததால், இந்த கிராமத்தின் பெரும்பாலான குழந்தைகளின் கல்வி கனவுகள் பாதியிலேயே முடங்கி வந்தன. பல குடும்பங்களில் பெண் குழந்தைகள் பத்தாம் வகுப்புக்குள்ளாகவே திருமணம் செய்து வைக்கப்படும் நிலையும் நீண்ட காலமாக தொடர்ந்தது.   இந்த சூழலில், இரண்டு பெண் குழந்தைகள் பத்தாம் வகுப்பைத் தாண்டி கல்லூரி செல்லும் நிகழ்வு, அந்த சமூகத்திற்கே பெரும் நம்பிக்கையையும் உற்சாகத்தையும் அளித்துள்ளது. இதையடுத்து, மாணவிகளை ஊரே கூடி வாத்தியங்கள் முழங்க, ஊர்வலமாக அழைத்து சென்று வாழ்த்தியது அனைவரையும் நெகிழ வைத்தது. மாணவிகளின் கண்களில் ஆனந்தக் கண்ணீர் வழிந்தோட, அவர்களின் பெற்றோர்களும் உணர்ச்சிவசப்பட்டனர்.   கடந்த 10 ஆண்டுகளுக்கு முன்பு வரை இந்த கிராமத்தில் கல்வி குறித்த அடிப்படை விழிப்புணர்வே இல்லை. அந்த நிலையில், ‘எய்டு இந்தியா’ அமைப்பைச் சேர்ந்த அரசுப் பள்ளி ஆசிரியர்கள் ராஜா மற்றும் பிச்சம்மாள் ஆகியோர், கிராம மக்களிடையே கல்வியின் முக்கியத்துவம் குறித்து தொடர்ந்து விழிப்புணர்வு ஏற்படுத்தினர். அதன் விளைவாக, தற்போது இந்த கிராமத்தைச் சேர்ந்த 30க்கும் மேற்பட்ட குழந்தைகள் அருகிலுள்ள அரசுப் பள்ளிகளில் ஆரம்பக் கல்வியை பயின்று வருகின்றனர்.   “கல்வி தனிநபரின் வாழ்க்கையை மட்டுமல்ல, ஒரு சமூகத்தின் எதிர்காலத்தையே மாற்றும் சக்தி கொண்டது” என்பதை இந்த இரண்டு மாணவிகள் நிரூபித்துள்ளனர். இவர்கள் பெற்றுள்ள இந்த வெற்றி, காமராஜ் நகரின் குழந்தைகளுக்கு புதிய பாதையையும், புதிய கனவுகளையும் உருவாக்கியுள்ளது. இந்த மாற்றத்தின் விதைகள் மேலும் விரிந்து வளர, அரசு மற்றும் சமூக அமைப்புகள் முன்வந்து ஆதரவு வழங்க வேண்டும் என்பதே கிராம மக்களின் ஒருமித்த எதிர்பார்ப்பாக உள்ளது.

நீட் தேர்வில் அடுத்தடுத்து வெளியாகும் முறைகேடு தகவல்கள் நாடு முழுவதும் அதிர்ச்சியை ஏற்படுத்தி வருகின்றன. வினாத்தாள் கசிவு, கருணை மதிப்பெண் சர்ச்சை என எழுந்த குற்றச்சாட்டுகள், தற்போது ஒரு குறிப்பிட்ட நபரின் பெயரை மையமாகக் கொண்டு விசாரணையை தீவிரப்படுத்தியுள்ளன. பீகார் மாநிலத்தைச் சேர்ந்த சஞ்சீவ் முகியா என்பவரே, இந்த நீட் தேர்வு முறைகேட்டின் பின்னணியில் முக்கிய மூளையாக செயல்பட்டிருப்பதாக காவல்துறை தரப்பில் கூறப்படுகிறது. ரூ.40 லட்சம் கொடுத்து வாங்கப்பட்ட வினாத்தாள்கள் கிடைத்துள்ள முதற்கட்ட விசாரணை தகவல்களின் அடிப்படையில், நீட் தேர்வு வினாத்தாள் ஒன்றை ரூ.40 லட்சம் வரை வசூலித்து, தேர்வர்கள் சிலருக்கு முன்கூட்டியே வழங்கப்பட்டுள்ளதாக கூறப்படுகிறது. மே 5ஆம் தேதி நடைபெற்ற நீட் தேர்வுக்கு முந்தைய நாளிலேயே, குறைந்தது 25 பேருக்கு வினா–விடைத்தாள்கள் சென்றடைந்ததாகவும் தகவல் வெளியாகியுள்ளது. இதன் மூலம் கோடிக்கணக்கான பணப்பரிவர்த்தனை நடந்திருக்கலாம் என சந்தேகம் எழுந்துள்ளது. 20 ஆண்டுகளாக வினாத்தாள் மோசடியில் ஈடுபட்டதாக குற்றச்சாட்டு சஞ்சீவ் முகியா, பெயரளவில் ஒரு கல்லூரியில் தொழில்நுட்ப உதவியாளராக பணியாற்றியதாக கூறப்பட்டாலும், உண்மையில் கடந்த இருபது ஆண்டுகளுக்கும் மேலாக வினாத்தாள் முறைகேடுகளையே தொழிலாக செய்து வந்திருக்கலாம் என காவல்துறை தெரிவிக்கிறது. அரசு தேர்வுகள், ஆசிரியர் தேர்வுகள், போட்டித் தேர்வுகள் என பல்வேறு தேர்வுகளில் அவர் தொடர்புடையதாக விசாரணையில் தெரிய வந்துள்ளது. 2016 முதல் தொடரும் சர்ச்சை வரலாறு 2016ஆம் ஆண்டு பீகார் அரசு பணியாளர் தேர்வாணையம் நடத்திய தேர்வில் வினாத்தாள் கசிவு வழக்கில் சஞ்சீவ் முகியா கைது செய்யப்பட்டிருந்தார். அந்த வழக்கில் இருந்து வெளியில் வந்தபோதும், அவர் மீண்டும் இதுபோன்ற முறைகேடுகளில் ஈடுபட்டதாக கூறப்படுகிறது. இதனால், அவர் மீது பழைய வழக்குகளையும் மீண்டும் தோண்டி எடுக்க காவல்துறை நடவடிக்கை எடுத்து வருகிறது. மகனும் சிறையில்… குடும்பமே சந்தேக வலையில் இந்த விவகாரத்தில் சஞ்சீவ் முகியாவின் மகன் சிவக்குமாரும் கைது செய்யப்பட்டுள்ளார். மருத்துவரான சிவக்குமார், பீகாரில் நடைபெற்ற ஆசிரியர் தேர்வு வினாத்தாள் கசிவு வழக்கில் தொடர்புடையவர் என கூறப்படுகிறது. தந்தை, மகன் என இருவரும் வினாத்தாள் முறைகேடுகளில் ஈடுபட்டதாக குற்றம்சாட்டப்பட்டுள்ள நிலையில், குடும்பம் முழுவதும் விசாரணை வளையத்திற்குள் வந்துள்ளது. அரசியல் பின்னணி குறித்த கேள்விகள் சஞ்சீவ் முகியாவின் மனைவி மம்தா தேவி, 2020ஆம் ஆண்டு பீகார் சட்டப்பேரவைத் தேர்தலில் லோக் ஜனசக்தி கட்சி சார்பில் போட்டியிட்டவர். அவர் பீகார் முதல்வர் நிதிஷ்குமாரை சந்தித்த புகைப்படங்கள் சமூக வலைதளங்களில் பரவியதை தொடர்ந்து, இந்த முறைகேட்டுக்கு அரசியல் பாதுகாப்பு இருந்ததா என்ற கேள்விகளையும் எதிர்க்கட்சிகள் எழுப்பி வருகின்றன. ஒரு கும்பலா செயல்பட்டது? நீட் தேர்வு முறைகேட்டில் சஞ்சீவ் முகியா மட்டும் அல்லாமல், பேராசிரியர்கள், இடைத்தரகர்கள், தொழில்நுட்ப உதவியாளர்கள் அடங்கிய ஒரு பெரிய கும்பலே செயல்பட்டிருக்கலாம் என காவல்துறை சந்தேகம் தெரிவிக்கிறது. செல்போன் மூலம் வினா–விடைகள் பரிமாறப்பட்டதாகவும், அங்கிருந்தே முறைகேடு தொடங்கியதாகவும் கூறப்படுகிறது. விரிவடையும் விசாரணை… அதிகரிக்கும் அதிர்ச்சி ஒவ்வொரு நாளும் வெளியாகும் புதிய தகவல்கள், நீட் தேர்வு முறைகேடு எவ்வளவு ஆழமாக வேரூன்றியுள்ளது என்பதை வெளிப்படுத்தி வருகின்றன. விசாரணை வட்டத்தை விரிவுபடுத்தியுள்ள காவல்துறை, இந்த விவகாரத்தில் தொடர்புடைய அனைவரையும் சட்டத்தின் முன் நிறுத்தப்படும் என உறுதியளித்துள்ளது.

10ஆம் வகுப்பு தேர்ச்சி பெற்றும் சேர்க்க மறுப்பு கோவை மாவட்டத்தில், பத்தாம் வகுப்பு தேர்ச்சி பெற்ற மாணவனை அரசு மேல்நிலைப் பள்ளியில் 11ஆம் வகுப்பில் சேர்க்க மறுத்த சம்பவம் அதிர்ச்சியை ஏற்படுத்தியுள்ளது. இதனால் பாதிக்கப்பட்ட மாணவன், மாவட்ட ஆட்சியர் அலுவலகத்தில் நேரடியாக புகார் மனு அளித்துள்ளார். அதே பள்ளியில் தொடர விருப்பம் கோவை கீரனத்தம் பகுதியைச் சேர்ந்த மாதேஷ் என்ற மாணவன், கோவில்பாளையம் அரசு மேல்நிலைப் பள்ளியில் 10ஆம் வகுப்பு பயின்று தேர்ச்சி பெற்றுள்ளார். இதையடுத்து, அதே பள்ளியில் 11ஆம் வகுப்பையும் தொடர விரும்பி விண்ணப்பம் அளித்துள்ளார். ஆசிரியர்கள் பல்வேறு காரணங்கள் கூறி மறுப்பு ஆனால், பள்ளி நிர்வாகம் மற்றும் ஆசிரியர்கள், பல்வேறு காரணங்களை கூறி மாணவனை 11ஆம் வகுப்பில் சேர்க்க மறுத்ததாக கூறப்படுகிறது. மாணவன் தனது பெற்றோருடன் சேர்ந்து பலமுறை பள்ளிக்கு சென்று கேட்டும், சேர்க்கை வழங்கப்படவில்லை என தெரிகிறது. கடைசியாக ஆட்சியர் அலுவலகத்தில் மனு இதனால் வேறு வழியின்றி, பாதிக்கப்பட்ட மாணவன் மாவட்ட ஆட்சியர் அலுவலகத்தை அணுகி மனு அளித்துள்ளார். அந்த மனுவில், “பள்ளி மாணவர்கள் கல்வியை இடைநிறுத்தாமல் தொடர அரசு பல்வேறு நடவடிக்கைகள் எடுத்து வரும் நிலையில், என்னை மட்டும் காரணமின்றி சேர்க்க மறுப்பது நியாயமல்ல. அதே பள்ளியில் 11ஆம் வகுப்பில் சேர்க்க உரிய நடவடிக்கை எடுக்க வேண்டும்” என்று தெரிவித்துள்ளார். கல்வி உரிமை கேள்விக்குறி? அரசுப் பள்ளிகளில் மாணவர்கள் சேர்க்கையை அதிகரிக்க பல்வேறு திட்டங்கள் செயல்படுத்தப்பட்டு வரும் நிலையில், 10ஆம் வகுப்பு தேர்ச்சி பெற்ற மாணவனையே மேல்நிலை வகுப்பில் சேர்க்க மறுப்பது கல்வி உரிமை குறித்த கேள்விகளை எழுப்பியுள்ளது. அதிகாரிகள் நடவடிக்கை எடுப்பார்களா? மாணவன் அளித்த மனுவின் அடிப்படையில், மாவட்ட நிர்வாகம் உரிய விசாரணை நடத்தி நடவடிக்கை எடுக்கும் என எதிர்பார்ப்பு நிலவுகிறது.

அனைவருக்கும் கல்வி என்ற முழக்கத்திற்கு நேர்மாறான சம்பவம் அனைவருக்கும் கல்வி, கட்டாயக் கல்வி என பள்ளிக் கல்வித்துறை பேசும் நேரத்தில், கல்வியில் பின்வரிசையில் இருக்கும் மாணவர்களை நூதனமாக நீக்கும் நடவடிக்கை தலைநகர் சென்னையில் அரங்கேறி இருக்கிறது. 9ஆம் வகுப்பு மாணவன் – மாற்றுச் சான்றிதழுடன் தவிப்பு சென்னை பெருங்குடி அடுத்த கந்தன்சாவடியில் உள்ள அரசு மேல்நிலைப் பள்ளியில், மாற்றுச் சான்றிதழ் (TC) பெற்ற 9ஆம் வகுப்பு மாணவன், தற்போது வேறு எங்கு படிப்பது என தெரியாமல் தவித்து வருகிறார். கற்கும் திறன் குறைவாக இருப்பதாகக் கூறிய ஆசிரியர்கள், மாணவனை ஐடிஐ-யில் சேர்த்துவிடுமாறு மடைமாற்றம் செய்ததாக கூறப்படுகிறது. அரசுப் பள்ளிகளில் நடக்காத நடைமுறை? 100% தேர்ச்சியை அடிப்படையாகக் கொண்டு, பொதுத் தேர்வுக்கு முந்தைய வகுப்பில் மாணவர்களை தேக்கி வைப்பதும், டி.சி. கொடுத்து வெளியேற்றுவதும் அரசுப் பள்ளிகளில் வழக்கமாக நடைபெறாத ஒன்று. ஆனால், இதை கந்தன்சாவடி அரசு மேல்நிலைப் பள்ளி செய்ததாக மாணவனின் பெற்றோர் குற்றம்சாட்டுகின்றனர். 100% தேர்ச்சி இலக்கே காரணமா? கற்றலில் முன்னேற்றம் உள்ள மாணவர்களை மட்டும் வைத்துக்கொண்டு, 10ஆம் வகுப்பில் 100 சதவிகித தேர்ச்சி இலக்கை எட்டும் நோக்கில், இந்த மாணவன் வெளியேற்றப்பட்டதாகும் என்ற குற்றச்சாட்டு வலுப்பெற்று வருகிறது. கல்வித் திட்டங்களின் நோக்கம் என்ன? கல்வியின் அவசியம் கருதி, கல்லாமையை இல்லாமை ஆக்குவோம் அறிவொளி இயக்கம் முதியோர் கல்வி இல்லம் தேடி கல்வி என பல திட்டங்கள் உருவாக்கப்பட்டன. ஆனால், இந்தச் சம்பவம் அந்த முயற்சிகளுக்கே கேள்விக்குறியாக அமைந்துள்ளது. பெற்றோரின் வேதனை மாணவனின் பெற்றோர் கூறுகையில், “படிப்பு வரலன்னு சொல்லி, ஐடிஐ-ல சேத்துவிடுங்கன்னு சொல்லி டி.சி. வாங்க வச்சாங்க. இப்போ ஐடிஐக்கு போனா அட்மிஷன் முடிஞ்சிருச்சுன்னு சொல்றாங்க. ஐடிஐ-ல கூப்பிட்டா உண்டு… இல்லன்னா அவ்ளோதான்” என வேதனையுடன் தெரிவித்தார். கல்வி இடைநிற்றல் – மிகப் பெரிய சமூகப் பிரச்சனை ஒருகாலத்தில் மாணவர்கள் இடைநிற்றல் கூடாது என்பதற்காக, அடுத்தடுத்த வகுப்புகளுக்கு உயர்த்தி ஊக்குவித்து அழைத்துவந்த நிலை மறைந்து, இன்று குற்ற உணர்ச்சியை ஏற்படுத்தி மாற்றுச் சான்றிதழ் கொடுத்து வெளியேற்றும் நிலை உருவாகியிருப்பது மிகப் பெரிய கொடுமை என சமூக ஆர்வலர்கள் சுட்டிக்காட்டுகின்றனர். அரசு தலையீடு அவசியம் இந்த விவகாரத்தில் தமிழக அரசு உடனடியாக தலையிட்டு, அந்த மாணவனின் கல்வி தொடர உரிய நடவடிக்கை எடுக்க வேண்டும் என்பதே சமூக ஆர்வலர்களின் கோரிக்கையாக உள்ளது.

ஊராட்சி மன்றத் தலைவர் தனிநிதியில் ஏற்பாடு – மாணவிகள் மகிழ்ச்சி திருப்பூர் மாவட்டம் படியூர் பகுதியில் உள்ள அரசு மேல்நிலைப் பள்ளி மாணவ மாணவிகளை பாதுகாப்பாகவும், நேரத்திற்கு பள்ளிக்கு அழைத்து செல்லவும் பிரத்யேக பேருந்து சேவை தொடங்கப்பட்டுள்ளது. ஊராட்சி மன்றத் தலைவர் தனது சொந்த நிதியில் இருந்து இந்த பேருந்தை வழங்கியுள்ள சம்பவம் அனைவரது கவனத்தையும் ஈர்த்துள்ளது. கிராமப்புற மாணவர்களின் பயண சிரமம் படியூர் அரசு மேல்நிலைப் பள்ளியில் 900-க்கும் மேற்பட்ட மாணவ மாணவிகளும், அருகில் உள்ள அரசு தொடக்கப் பள்ளியில் 200-க்கும் அதிகமான மாணவ மாணவிகளும் கல்வி பயின்று வருகின்றனர். இவர்கள் பெரும்பாலும் சுற்றுவட்டார கிராமங்களில் இருந்து தினந்தோறும் பள்ளிக்கு வந்து செல்கின்றனர். பேருந்து வசதி போதிய அளவில் இல்லாததால், சில மாணவர்கள் பெற்றோர் உதவியுடன், சிலர் சைக்கிளிலும், சிலர் நடந்தும் பள்ளிக்கு சென்று வந்துள்ளனர். குறிப்பாக மாணவிகள் மாலை நேரங்களில் தனியாக கிராமங்களுக்கு திரும்ப வேண்டிய சூழல் பாதுகாப்பு குறித்த கவலையை ஏற்படுத்தி வந்தது. ஒரே அரசு பேருந்து – தொடர்ந்த கோரிக்கை இந்த பள்ளி வழியாக ஒரே ஒரு அரசு பேருந்து மட்டுமே இயக்கப்பட்டு வந்ததால், குறித்த நேரத்தில் பள்ளிக்கு செல்வதும், வீடு திரும்புவதும் மாணவர்களுக்கு சிரமமாக இருந்தது. இதனால் கூடுதல் பேருந்து இயக்க வேண்டும் என தொடர்ந்து மனுக்கள் அளிக்கப்பட்டு வந்தன. ஊராட்சி தலைவர் எடுத்த முன்னெடுப்பு இந்த நிலையில், படியூர் ஊராட்சி மன்றத் தலைவர் ஜீவிதா சண்முகசுந்தரம், அரசுப் பள்ளி மாணவர்களின் நலனை கருத்தில் கொண்டு, தனது சொந்த நிதியில் இருந்து சுமார் 16 லட்சம் ரூபாய் செலவில் பள்ளிக்கென தனி பேருந்தை ஏற்பாடு செய்துள்ளார். இந்த பேருந்து, பள்ளி மாணவர்களை காலை மற்றும் மாலை நேரங்களில் வீட்டில் இருந்து பள்ளிக்கும், பள்ளியில் இருந்து வீட்டிற்கும் அழைத்து செல்லும் வகையில் இயக்கப்படுகிறது. பாதுகாப்பு வசதிகளுடன் பேருந்து பேருந்தில் ஜிபிஎஸ் வசதி, கண்காணிப்பு கேமராக்கள், வேக கட்டுப்பாட்டு கருவிகள் உள்ளிட்ட பள்ளி வாகனங்களுக்கு விதிக்கப்பட்டுள்ள அனைத்து பாதுகாப்பு விதிமுறைகளும் பின்பற்றப்பட்டுள்ளன. மேலும், ஓட்டுநர் மற்றும் மாணவர்களை ஏற்றி இறக்கும் உதவியாளர் உள்ளிட்ட அனைத்து பராமரிப்புகளையும் ஊராட்சி மன்றத் தலைவரே பொறுப்பேற்க இருப்பதாக உறுதி அளித்துள்ளார். “மாணவிகள் தைரியமாக படிக்க முடியும்” இதுகுறித்து ஊராட்சி மன்றத் தலைவர் ஜீவிதா சண்முகசுந்தரம் கூறுகையில், “இந்த பேருந்து சேவையால் கிராமப்புறங்களில் இருந்து பள்ளிக்கு வரும் குழந்தைகளின் எண்ணிக்கை அதிகரிக்கும். மாலை நேர சிறப்பு வகுப்புகளிலும் மாணவிகள் அச்சமின்றி கலந்து கொண்டு நல்ல மதிப்பெண்கள் பெற முடியும். குறித்த நேரத்திற்கு பள்ளிக்கு வர முடிவதால் கல்வி பாதிக்கப்படாது” என தெரிவித்தார். மாணவிகள் மகிழ்ச்சி பேருந்து சேவையால் மாணவ மாணவிகள் மகிழ்ச்சி அடைந்துள்ளனர். “தனியார் பள்ளி மாணவர்கள் பேருந்தில் செல்வதை ஏக்கத்துடன் பார்த்த காலம் மாறிவிட்டது. இனி அரசு பேருந்தில் கூட்ட நெரிசலில் பயணிக்கவும், நடந்தும் பள்ளிக்கு வரவும் வேண்டிய நிலை இல்லை” என மாணவிகள் தெரிவித்தனர். கல்வி இடைநிற்றல் தவிர்ப்பு இந்த பேருந்து வசதி மூலம் கிராமப்புற மாணவர்களின் கல்வி இடைநிற்றல் தவிர்க்கப்படும் என்றும், பாதுகாப்பும் கல்வி நேரமும் அதிகரிக்கும் என்றும் கல்வியாளர்கள் கருத்து தெரிவித்துள்ளனர். இதுபோன்ற திட்டங்களை அரசு முன்வந்து மற்ற கிராமப்புற அரசு மேல்நிலைப் பள்ளிகளிலும் செயல்படுத்த வேண்டும் என கோரிக்கை எழுந்துள்ளது.

சேலம்: அரசு பள்ளியில் மாணவர் மோதல் சேலம் மாவட்டம் எடப்பாடியில் உள்ள அரசு ஆண்கள் மேல்நிலைப் பள்ளியில், மாணவர்கள் இடையே ஏற்பட்ட மோதல் தொடர்பாக பெற்றோர்கள் பள்ளியை முற்றுகையிட்டதால் பரபரப்பு ஏற்பட்டது. 11, 12ஆம் வகுப்பு மாணவர்கள் இடையே அடிக்கடி மோதல் எடப்பாடி அரசு ஆண்கள் மேல்நிலைப் பள்ளியில் 2,000-த்துக்கும் மேற்பட்ட மாணவர்கள் பயின்று வருகின்றனர். இந்த பள்ளியில் 11 மற்றும் 12ஆம் வகுப்பு மாணவர்கள் இடையே அவ்வப்போது குழுக்களாக பிரிந்து மோதல் ஏற்படுவதாக கூறப்படுகிறது. அந்த வகையில், நேற்று (15ஆம் தேதி) மதிய வேளையில், வகுப்பு நடைபெறும் நேரத்திலேயே 11ஆம் வகுப்பு மற்றும் 12ஆம் வகுப்பு மாணவர்கள் இரு கோஷ்டிகளாக பிரிந்து ஒருவரை ஒருவர் தாக்கிக் கொண்டதாக தெரிகிறது. இந்த மோதலில் சில மாணவர்களுக்கு காயம் ஏற்பட்டுள்ளது. பெற்றோர்கள் பள்ளிக்கு வந்து கேள்வி மோதலில் காயமடைந்த மாணவர்கள், இன்று தங்களது பெற்றோர்களுடன் பள்ளிக்கு வந்து உதவி தலைமை ஆசிரியரை சந்தித்து விளக்கம் கேட்டுள்ளனர். அப்போது, உதவி தலைமை ஆசிரியர் செந்தில்குமார் மற்றும் தொழிலியல் ஆசிரியர் மாரிமுத்து ஆகியோர் உரிய விளக்கம் அளிக்கவில்லை என பெற்றோர்கள் குற்றம்சாட்டினர். தலைமை ஆசிரியர் அறை முன்பு முற்றுகை இதனைத் தொடர்ந்து, பெற்றோர்கள் மற்றும் அவர்களது உறவினர்கள் இணைந்து பள்ளி தலைமை ஆசிரியர் அறையின் முன்பு முற்றுகையில் ஈடுபட்டனர். தங்களது குழந்தைகளை தாக்கிய மாணவர்கள் மீது கடும் நடவடிக்கை எடுக்க வேண்டும் என அவர்கள் கோரிக்கை வைத்தனர். இதனால் பள்ளி வளாகத்தில் சிறிது நேரம் பரபரப்பான சூழல் ஏற்பட்டது. போலீசார் பேச்சுவார்த்தை தகவல் அறிந்து சம்பவ இடத்திற்கு எடப்பாடி காவல் உதவி ஆய்வாளர் ஐயப்பன் தலைமையிலான போலீசார் விரைந்து வந்தனர். உதவி தலைமை ஆசிரியர் செந்தில்குமார், மாணவர்களின் பெற்றோர்கள் மற்றும் தொடர்புடையவர்களுடன் போலீசார் பேச்சுவார்த்தை நடத்தினர். எழுத்துப்பூர்வ உறுதி – முற்றுகை வாபஸ் பேச்சுவார்த்தையின் முடிவில், சம்பவத்தில் ஈடுபட்ட மாணவர்கள் மற்றும் அவர்களது பெற்றோரிடம் இருந்து இனிமேல் இதுபோன்ற சம்பவங்கள் நடைபெறாது என எழுத்துப்பூர்வமாக உறுதி பெற்றுக் கொள்ளப்பட்டது. இதனைத் தொடர்ந்து, முற்றுகையில் ஈடுபட்ட பெற்றோர்கள் கலைந்து சென்றனர். இதனால் பள்ளி வளாகத்தில் நிலவிய பரபரப்பு முடிவுக்கு வந்தது.

ஆன்மீகம் – கல்வி பிரிவால் சமூகத் திசை திரும்பியுள்ளது: ஆளுநர் ஆர்.என்.ரவி ஆன்மீகம் மற்றும் கல்வி ஒன்றாக இணைந்திருந்த இந்திய பாரம்பரியம், தவறான விளக்கங்களும் அரசியல் சூழலும் காரணமாக சிதைக்கப்பட்டுள்ளதாக தமிழக ஆளுநர் ஆர்.என்.ரவி தெரிவித்துள்ளார். இதன் விளைவாக, சொந்த நாட்டிலேயே நாமே அந்நியர்களாக மாறியுள்ளோம் என்றும் அவர் கூறினார். திருவாசகம் ஒப்புவித்தல் போட்டி – பரிசளிப்பு விழா மதுரை தெப்பக்குளத்தில் உள்ள தியாகராசர் கலைக் கல்லூரியில், கருமுத்து தியாகராச செட்டியார் நினைவு அறக்கட்டளை நிறுவனர் தின விழா மற்றும் கருமுத்து கண்ணன் நினைவு திருவாசகம் ஒப்புவித்தல் போட்டிக்கான பரிசளிப்பு விழா இன்று நடைபெற்றது. இந்த நிகழ்ச்சியில் பங்கேற்ற ஆளுநர் ஆர்.என்.ரவி, மாநில அளவில் வெற்றி பெற்ற மாணவ, மாணவிகளுக்கு பரிசுகளை வழங்கி பாராட்டினார். தொடர்ந்து, திருவாசகம் பாடி வெற்றி பெற்ற மாணவர்களை நேரில் பாடச் சொல்லி, அதனை ரசித்தும் கேட்டார். “இளம்தலைமுறை திருவாசகம் படிப்பது மகிழ்ச்சி” விழாவில் உரையாற்றிய ஆளுநர் ஆர்.என்.ரவி, “இளம்தலைமுறையினர் திருவாசகம் படிப்பதை பார்க்கும் போது மிகுந்த மகிழ்ச்சி ஏற்படுகிறது” என்று தெரிவித்தார். மேலும், “இந்தியாவை பிரிட்டிஷ்காரர்கள் திட்டமிட்டு பிரித்தனர். நம்மை நமது பண்பாடு, கல்வி, ஆன்மீகம் மற்றும் வாழ்க்கை முறைகளில் பின்தங்கச் செய்தனர்” என்று அவர் கூறினார். “கல்வி வணிகமாக மாற்றப்பட்டுள்ளது” தமிழகத்தின் உயர் கல்வி சூழலைக் குறிப்பிட்டு பேசிய ஆளுநர், “தமிழ்நாட்டில் பெரும்பாலான பொறியியல் கல்லூரிகளில் போலியான பேராசிரியர்கள் பாடம் நடத்துகின்றனர். சில பேராசிரியர்கள் ஒரே நேரத்தில் 30 கல்லூரிகளுக்கு பாடம் நடத்துவது அதிர்ச்சியளிக்கிறது” என்று குற்றம்சாட்டினார். மேலும், “பல கல்லூரிகளில் கல்வியை விட பணமே முதன்மையாக மாறியுள்ளது. வணிக நோக்கத்திற்காகவே கல்வி நிறுவனங்கள் தொடங்கப்படுகின்றன” என்றும் அவர் தெரிவித்தார். “தமிழகம் ஆன்மீகத்தின் தலைநகரம்” தமிழகத்தின் ஆன்மீக மரபை நினைவூட்டிய ஆளுநர், “தமிழகம் பாரத நாட்டின் ஆன்மீகத் தலைநகரமாக இருந்தது. ஆழ்வார்கள், நாயன்மார்கள் போன்ற தலைசிறந்த ஆன்மீகவாதிகள் தமிழ் மண்ணில்தான் தோன்றினர்” என்றார். திருமுறை, நாலாயிர திவ்ய பிரபந்தம் போன்ற பக்தி இலக்கியங்கள், கல்வி பயிலாத மக்களுக்கும் ஆன்மீகத்தை எடுத்துச் சென்றதாகவும் அவர் குறிப்பிட்டார். “பிரிட்டிஷ் ஆட்சியில் ஆவணங்கள் அழிக்கப்பட்டன” “ஆங்கிலேயர் ஆட்சிக்கு முன்பாக திருவாசகம் போன்ற இலக்கியங்கள் நாடு முழுவதும் ஆவணப்படுத்தப்பட்டிருந்தன. ஆனால் பிரிட்டிஷ் ஆட்சிக்காலத்தில் அவை முறையாக அழிக்கப்பட்டன” என்று கூறிய ஆளுநர், 200 ஆண்டுகளுக்கு முன்பு இந்தியா கல்வி மற்றும் பொருளாதாரத்தில் உலகின் முன்னணி நாடாக இருந்ததாகவும் நினைவூட்டினார். “சனாதன தர்மம் சமூக முன்னேற்றத்துக்கானது” உரையின் நிறைவில் அவர், “சனாதன தர்மத்தை கடைபிடிப்பவர்கள் சமூகத்தையும் நாட்டையும் மேம்படுத்த நினைப்பார்கள். திருவாசகம் போன்ற பக்தி இலக்கியங்கள் மனிதனை உயர்த்தும் சக்தி கொண்டவை” என்று தெரிவித்தார்.

உசிலம்பட்டி: ‘என் மகனை படிக்கவச்ச இடம் இது’ மதுரை மாவட்டம் உசிலம்பட்டி அருகே, தனது மகன் படித்த அரசுப் பள்ளிக்காக கூலி வாங்காமல் மராமத்து வேலை செய்து கொடுத்த கொத்தனாரின் செயல், அனைவரையும் நெகிழ வைத்துள்ளது. இந்த மனிதநேயச் செயலுக்கு மாவட்ட ஆட்சியரும் நேரில் அழைத்து பாராட்டு தெரிவித்துள்ளார். எழுமலை அரசு பள்ளியில் மராமத்து தேவை உசிலம்பட்டி அருகே உள்ள எழுமலை அரசு ஆண்கள் மேல்நிலைப் பள்ளி கட்டடத்தில், பல்வேறு மராமத்து பணிகள் தேவைப்பட்டு வந்துள்ளன. இதையறிந்த பள்ளியின் தலைமை ஆசிரியர் தனபால் மற்றும் முதுகலை பொருளியல் ஆசிரியர் முருகேசன், அந்தப் பள்ளியில் படித்த முன்னாள் மாணவனின் தந்தையும், உத்தப்புரத்தைச் சேர்ந்த கொத்தனாருமான அழகு முருகன் என்பவரை மராமத்து பணிகளை பார்க்குமாறு கேட்டுக் கொண்டனர். மூன்று நாட்கள் இலவச சேவை அதன்பேரில், அழகு முருகன் பள்ளிக்கு வந்து மூன்று நாட்கள் தொடர்ந்து பள்ளியில் உள்ள அனைத்து மராமத்து பணிகளையும் செய்து முடித்துள்ளார். பணிகள் முடிந்த பிறகு, ஆசிரியர்கள் கூலி வழங்க முனைந்தபோது, “எனக்கு கூலி வேண்டாம். இந்த பள்ளிக்காக இலவசமாக செய்கிறேன்” என்று கூறி பணத்தை வாங்க மறுத்துள்ளார். ‘இந்த பள்ளி என் மகனுக்கு நிறைய செய்துள்ளது’ ஆசிரியர்கள் வலியுறுத்தியும் கூலியை ஏற்க மறுத்த அழகு முருகன், “இந்த பள்ளி என் மகனுக்கு எவ்வளவோ செய்துள்ளது. அந்த நன்றிக்கு என்னால் முடிந்த சிறிய உதவியாக இது இருக்கட்டும்” என்று தெரிவித்தார். மகனின் கல்வி பயணம் இது குறித்து அழகு முருகன் கூறுகையில், “எனது மகன் கடந்த ஆண்டு இந்தப் பள்ளியில் பிளஸ் 2 முடித்துவிட்டு, தற்போது திண்டுக்கல் காந்திகிராமம் கிராமிய நிகர்நிலைப் பல்கலைக்கழகத்தில் பி.ஏ. படித்து வருகிறார். அவனது கல்வி வளர்ச்சிக்கு காரணமான பள்ளிக்கு ஏதாவது செய்ய வேண்டும் என்று நினைத்தேன். அதனால்தான் கூலி வாங்காமல் வேலை செய்தேன். இது எனக்கு மன நிறைவைத் தருகிறது” என்றார். ஆசிரியர்கள் நெகிழ்ச்சி பள்ளி ஆசிரியர்கள் கூறுகையில், “எங்கள் பள்ளி மாணவர்களின் மீது மிகுந்த அக்கறையுடன் செயல்பட்டு வருகிறது. அழகு முருகன் அவர்களின் மகன் பீமனும் எங்கள் முன்னாள் மாணவர். அவர் பிளஸ் 2 முடித்த பிறகும் விடுமுறை நாட்களில் பள்ளிக்கு வந்து பூச்செடிகள், மரங்களை நட்டு பராமரித்தார். இப்போது அவரது தந்தை பணம் வாங்காமல் பள்ளியில் வேலை செய்தது எங்களுக்கு மிகுந்த மகிழ்ச்சியை அளித்தது” என்றனர். மாவட்ட ஆட்சியர் பாராட்டு இந்த மனிதநேயச் செயலை அறிந்த மாவட்ட ஆட்சியர், அழகு முருகனை நேரில் அழைத்து சால்வை அணிவித்து பாராட்டினார். “ஆட்சியர் வழங்கிய இந்த கௌரவம், எங்கள் பள்ளிக்கே கிடைத்த பரிசு” என்று ஆசிரியர்கள் பெருமையுடன் தெரிவித்தனர்.

தமிழகத்தைச் சேர்ந்த இரண்டு ஆசிரியர்களுக்கு, இந்த ஆண்டிற்கான தேசிய நல்லாசிரியர் விருது அறிவிக்கப்பட்டுள்ளது. வேலூர் மாவட்டத்தைச் சேர்ந்த கோபிநாத் மற்றும் மதுரையைச் சேர்ந்த முரளிதரன் ஆகியோர் இந்த உயரிய விருதுக்கு தேர்வாகியுள்ளனர். நாடு முழுவதும் இருந்து 50 பேர் தேர்வு தேசிய நல்லாசிரியர் விருதுக்காக, நாடு முழுவதும் உள்ள ஆசிரியர்களிடமிருந்து கடந்த ஜூன் மாதம் விண்ணப்பங்கள் பெறப்பட்டன. அதில் இருந்து கல்வித்துறையில் சிறப்பான சேவை புரிந்த 50 ஆசிரியர்கள் இந்த ஆண்டுக்கான விருதுக்கு தேர்வு செய்யப்பட்டுள்ளனர். தமிழகத்திலிருந்து கோபிநாத் – முரளிதரன் தேர்வு அந்த வகையில், வேலூர் மாவட்டம் ராஜகுப்பம் ஊராட்சி ஒன்றிய நடுநிலைப் பள்ளி ஆசிரியர் கோபிநாத், மதுரை டி.வி.எஸ். மேல்நிலைப் பள்ளியைச் சேர்ந்த முரளிதரன் ஆகிய இருவரும் தேசிய நல்லாசிரியர் விருதுக்கு தேர்வு செய்யப்பட்டுள்ளனர். செப்டம்பர் 5-ம் தேதி விருது வழங்கல் வருகிற செப்டம்பர் 5ஆம் தேதி, ஆசிரியர் தினத்தை முன்னிட்டு, டெல்லியில் உள்ள விஞ்ஞான் பவனில் நடைபெறும் விழாவில், குடியரசுத் தலைவர் திரவுபதி முர்மு அவர்களிடமிருந்து இருவரும் விருதைப் பெற உள்ளனர். தேசிய நல்லாசிரியர் விருதின் கீழ், 50,000 ரூபாய் ரொக்கப் பரிசு, வெள்ளிப் பதக்கம், பாராட்டு சான்றிதழ் வழங்கப்படுகிறது. பாராட்டுகள் குவிப்பு தமிழகத்தைச் சேர்ந்த இரண்டு ஆசிரியர்கள் இந்த தேசிய விருதைப் பெற உள்ள நிலையில், அவர்களுக்கு பல்வேறு தரப்பினரிடமிருந்து பாராட்டுகள் குவிந்து வருகின்றன. பள்ளிக்கல்வித்துறை அமைச்சர் அன்பில் மகேஸ் பொய்யாமொழி, சமூக வலைதளங்கள் மூலமாகவும், தொலைபேசி மூலமாகவும் கோபிநாத் மற்றும் முரளிதரனுக்கு வாழ்த்து தெரிவித்துள்ளார்.

தருமபுரி அருகே உள்ள ஒரு சிறிய கிராமத்தில், விவசாயக் கூலி தொழிலாளர்களாக வாழும் தம்பதியரின் மூன்று பிள்ளைகளும் மருத்துவப் படிப்பில் சேர்ந்திருப்பது, அரசுப் பள்ளிகளின் கல்வி சக்தியையும், ஆசிரியர்களின் அர்ப்பணிப்பையும் வெளிப்படுத்தும் நிகழ்வாக கவனம் பெற்றுள்ளது. தருமபுரி மாவட்டம் தண்டுக்காரன்பட்டி கிராமத்தைச் சேர்ந்த மாதம்மாள் – அவரது கணவர் ஆகியோர் விவசாயம் மற்றும் கூலி வேலை செய்து குடும்பத்தை நடத்தி வருகின்றனர். குறைந்த வருமானம், எளிய வாழ்க்கை என்ற நிலையிலும், கல்வியே தங்கள் பிள்ளைகளின் எதிர்காலம் என்ற உறுதியுடன், மூன்று பிள்ளைகளையும் அரசு பள்ளியிலேயே படிக்க வைத்தனர். “மருத்துவராக்க வேண்டும்” – பெற்றோரின் கனவு இந்த தம்பதியரின் மூத்த மகள் சந்தியா சிறுவயதிலிருந்தே படிப்பில் திறமை காட்டியதை கவனித்த பெற்றோர், அவரை மருத்துவராக்க வேண்டும் என்ற கனவை வளர்த்தனர். 2019ஆம் ஆண்டு பன்னிரண்டாம் வகுப்பு முடித்த சந்தியா, முதல் முறையாக நீட் தேர்வெழுதியபோது போதிய மதிப்பெண் பெற முடியாததால் மருத்துவப் படிப்பில் சேர முடியவில்லை. அதன் பின்னர் தருமபுரி அரசு கலைக் கல்லூரியில் இளங்கலைப் படிப்பில் சேர்ந்த சந்தியாவுக்கு, தமிழக அரசு கொண்டு வந்த அரசுப் பள்ளி மாணவர்களுக்கான 7.5 சதவீத இட ஒதுக்கீடு ஒரு திருப்புமுனையாக அமைந்தது. இரண்டாம் முயற்சியில் மருத்துவக் கனவு நனவானது மனதை தளர விடாமல் மீண்டும் நீட் தேர்வுக்கு தயாரான சந்தியா, 2021–22 கல்வியாண்டில் தேர்ச்சி பெற்று, 7.5 சதவீத இட ஒதுக்கீட்டின் கீழ் கரூர் அரசு மருத்துவக் கல்லூரியில் சேரும் வாய்ப்பைப் பெற்றார். தற்போது அவர் அங்கு மூன்றாம் ஆண்டு மருத்துவ மாணவியாகப் பயின்று வருகிறார். அண்ணியின் வழிகாட்டுதலில் தம்பிகள் மூத்த சகோதரியான சந்தியாவின் சாதனை, அவரது தம்பிகள் ஹரிபிரசாத் மற்றும் சூரிய பிரகாஷுக்கு பெரும் ஊக்கமாக அமைந்தது. சந்தியா வழங்கிய ஆலோசனைகள் மற்றும் வழிகாட்டுதலால், ஹரிபிரசாத் 2023–24 கல்வியாண்டில் நீட் தேர்வில் நல்ல மதிப்பெண் பெற்று, சேலம் அரசு மருத்துவக் கல்லூரியில் 7.5 சதவீத இட ஒதுக்கீட்டின் கீழ் சேர்ந்துள்ளார். அதேபோல் இளைய மகன் சூரிய பிரகாஷும் நீட் தேர்வில் வெற்றி பெற்று, கரூர் அரசு மருத்துவக் கல்லூரியில் மருத்துவப் படிப்பை தொடங்கியுள்ளார். ஆசிரியர்களின் சொந்த செலவில் நீட் பயிற்சி இந்த குடும்பத்தின் மூன்றாவது வெற்றிக்கு பின்னணியாக, அரசுப் பள்ளி ஆசிரியர்களின் அர்ப்பணிப்பு முக்கிய காரணமாக அமைந்துள்ளது. ஏலகிரி அரசு மேல்நிலைப் பள்ளியில் படித்த சூரிய பிரகாஷுக்கு, குடும்பத்தின் பொருளாதார நிலையை கருத்தில் கொண்டு, நீட் பயிற்சிக்கான கட்டணத்தை ஆசிரியர்களே தங்களது சொந்த செலவில் ஏற்று படிக்க வைத்துள்ளனர். அரசுப் பள்ளிகள் – நம்பிக்கையின் வெளிச்சம் “எட்டாக் கனியாக இருந்த மருத்துவப் படிப்பு, 7.5 சதவீத இட ஒதுக்கீட்டால் எங்களுக்குக் கிட்டிய கனியாக மாறியுள்ளது” என்று இந்த மாணவர்கள் உருக்கமாக தெரிவித்துள்ளனர். ஒரே குடும்பத்தைச் சேர்ந்த மூன்று மாணவர்கள், அரசுப் பள்ளியில் படித்து, நீட் தேர்வில் வெற்றி பெற்று மருத்துவக் கல்லூரியில் சேர்ந்திருப்பது, அரசுப் பள்ளிகள் சாமானிய மக்களின் வாழ்க்கையை மாற்றும் சக்தியாக மாறி வருவதை எடுத்துக்காட்டுகிறது. அதே நேரத்தில், மாணவர்களை சொந்த பிள்ளைகள்போல் கருதி உழைக்கும் ஆசிரியர்களால் தான், அரசுப் பள்ளிகள் இன்று நம்பிக்கையின் ஒளியாக மாறி வருவதாக கல்வியாளர்கள் கூறுகின்றனர்.

“மாநிலத்துக்கான கல்வி நிதியை விடுவிப்பதற்குப் பதிலாக, தேசிய கல்விக் கொள்கையை ஏற்றுக்கொள்ள வேண்டும் என்று மத்திய அரசு அழுத்தம் கொடுக்கிறது” என மத்திய பாஜக அரசின் மீது தமிழ்நாடு பள்ளிக்கல்வித்துறை அமைச்சர் அன்பில் மகேஸ் பொய்யாமொழி குற்றம்சாட்டியுள்ளார். அமரர் அன்பில் பொய்யாமொழியின் 25-ஆவது ஆண்டு நினைவு தினத்தை முன்னிட்டு, திருச்சியில் உள்ள திமுக தெற்கு மாவட்ட அலுவலகத்தில் அவரது திருவுருவப் படத்திற்கு மாலை அணிவித்து மலர் தூவி அமைச்சர் அன்பில் மகேஸ் பொய்யாமொழி மரியாதை செலுத்தினார். இதைத் தொடர்ந்து செய்தியாளர்களை சந்தித்துப் பேசினார். 573 கோடி ரூபாய் இன்னும் விடுவிக்கப்படவில்லை அப்போது அவர் கூறியதாவது, “அனைவருக்கும் கல்வி திட்டத்தின் கீழ் மத்திய அரசு தமிழகத்திற்கு வழங்க வேண்டிய பங்கீடு தொகையான 573 கோடி ரூபாய் இதுவரை விடுவிக்கப்படவில்லை. இது குறித்து முதல்வர் மு.க.ஸ்டாலின் அமெரிக்கா செல்லும் முன்பே மத்திய அரசை வலியுறுத்தி விட்டு சென்றுள்ளார். மேலும், நாடாளுமன்ற குழுத் தலைவர் கனிமொழி தலைமையில் தமிழக எம்பிகள் அனைவரும் மத்திய கல்வி அமைச்சர் தர்மேந்திர பிரதானை நேரில் சந்தித்து இந்த கோரிக்கையை வலியுறுத்தினோம். மாணவர்களின் கல்வி நலனை கருத்தில் கொண்டு இதில் அரசியல் செய்ய வேண்டாம் என்றும் தெளிவாக கூறினோம்.” “தேசிய கல்விக் கொள்கை ஏற்றால் தான் நிதி” – மத்திய அரசு நிபந்தனை “ஆனால், மத்திய அரசு ‘தேசிய கல்விக் கொள்கையை ஏற்றுக்கொண்டால் மட்டுமே நிதி வழங்க முடியும்’ என்று கூறுகிறது. குறிப்பாக, ‘புதிய கல்விக் கொள்கையை அடிப்படையாக கொண்ட பிஎம்ஸ்ரீ (PM SHRI) திட்டத்தில் மாநில அரசு இணைய வேண்டும்’ என அழுத்தம் கொடுக்கிறது. இதற்கும், அனைவருக்கும் கல்வி திட்டத்திற்கும் எந்த சம்பந்தமும் இல்லை. தேசிய கல்விக் கொள்கை 2020ஆம் ஆண்டில்தான் கொண்டு வரப்பட்டது. ஆனால் அனைவருக்கும் கல்வி திட்டம் 2018ஆம் ஆண்டிலேயே அமல்படுத்தப்பட்டுவிட்டது” என்றார். மும்மொழிக் கொள்கையை ஒருபோதும் ஏற்றுக்கொள்ளாது “இந்த விவகாரத்தில் அரசியல் செய்யாமல், உடனடியாக மத்திய அரசு தமிழகத்திற்கு உரிய நிதியை விடுவிக்க வேண்டும். நிதியை விடுவிப்பார்கள் என்ற நம்பிக்கை எங்களுக்கு உள்ளது. தேசிய கல்விக் கொள்கையை ஏற்றுக்கொள்ள வேண்டும் என்று தொடர்ந்து அழுத்தம் கொடுக்கப்பட்டாலும், மும்மொழிக் கொள்கையை தமிழகம் ஒருபோதும் ஏற்றுக்கொள்ளாது. இதில் எந்த மாற்றமும் இல்லை” என்று அமைச்சர் உறுதியாகத் தெரிவித்தார். ஆசிரியர் சம்பளத்தில் பாதிப்பு இல்லை மேலும் அவர் கூறுகையில், “மத்திய அரசு நிதி வழங்காததால் ஏற்பட்டுள்ள நிதிச் சுமையை சமாளிக்க தமிழக முதல்வர் பல்வேறு நடவடிக்கைகளை மேற்கொண்டு வருகிறார். தமிழகத்தில் ஆசிரியர்களின் சம்பளம் உள்ளிட்ட செலவினங்களில் எந்தவித பாதிப்பும் ஏற்படாத வகையில் அரசு தொடர்ந்து செயல்பட்டு வருகிறது” என்றார்.

தமிழ்த் திரையுலகில் பொருளாதார சிரமங்களை எதிர்கொண்டு வரும் இயக்குநர்கள் மற்றும் உதவி இயக்குநர்களின் குடும்பங்களை ஆதரிக்கும் வகையில், அவர்களின் குழந்தைகளின் கல்விக்காக ஆண்டுதோறும் 10 லட்சம் ரூபாய் நிதியுதவி வழங்கப்படும் என ஐஸ்வர்யா ரஜினிகாந்த் அறிவித்துள்ளார். திரையுலகில் மறைமுகமாக உழைக்கும் பலரின் வாழ்க்கைச் சவால்களை கருத்தில் கொண்டு எடுக்கப்பட்ட இந்த முடிவு, சினிமா வட்டாரத்தில் பாராட்டுகளை பெற்றுள்ளது. ’3’ படத்தின் மூலம் இயக்குநராக அறிமுகமான ஐஸ்வர்யா ரஜினிகாந்த், தொடர்ந்து ’வை ராஜா வை’, ’லால் சலாம்’ போன்ற படங்களை இயக்கி தனித்துவமான அடையாளத்தை உருவாக்கியவர். இந்த நிலையில், முறையான வருமானம் இன்றி தவிக்கும் இயக்குநர்கள் மற்றும் உதவி இயக்குநர்களின் குழந்தைகள் கல்வி தொடர முடியாமல் பாதிக்கப்படக் கூடாது என்ற நோக்கில், இந்த கல்வி நிதியுதவி திட்டத்தை அவர் தொடங்கியுள்ளார். 2024ஆம் ஆண்டுக்கான நிதி வழங்கல் இந்தத் திட்டத்தின் ஒரு பகுதியாக, 2024ஆம் ஆண்டுக்கான கல்வி நிதியை ஐஸ்வர்யா ரஜினிகாந்த், திரைப்பட இயக்குநர்கள் சங்கத் தலைவர் ஆர்.வி. உதயகுமாரிடம் வழங்கினார். இந்த நிகழ்வில் சங்க செயலாளர் பேரரசு, பொருளாளர் சரண் மற்றும் பெப்ஸி தலைவர் ஆர்.கே. செல்வமணி ஆகியோர் உடனிருந்தனர். இந்த நிதி, கல்வி உதவி தேவைப்படும் இயக்குநர்கள் மற்றும் உதவி இயக்குநர்களின் வாரிசுகளுக்கு சங்கத்தின் மூலம் முறையாக வழங்கப்படும் என தெரிவிக்கப்பட்டுள்ளது. “உழைப்பின் பின்னால் இருக்கும் குடும்பங்களை மறக்கக் கூடாது” திரைப்படத் துறையில் வெற்றியும் புகழும் சிலருக்கே கிடைத்தாலும், அதன் பின்னால் எண்ணற்ற இயக்குநர்கள் மற்றும் உதவி இயக்குநர்கள் கடும் பொருளாதார சிரமங்களுடன் போராடி வருவதாகவும், அவர்களது குழந்தைகளின் கல்வி பாதிக்கப்படுவது வேதனையளிப்பதாகவும் திரையுலகினர் கூறுகின்றனர். அந்த வகையில், கல்வி வழியே அடுத்த தலைமுறைக்கு பாதுகாப்பு உருவாக்க வேண்டும் என்ற எண்ணத்தில் ஐஸ்வர்யா ரஜினிகாந்த் எடுத்துள்ள இந்த முன்னெடுப்பு, சமூக பொறுப்புணர்வின் சிறந்த எடுத்துக்காட்டாக பார்க்கப்படுகிறது. இந்த நிதியுதவி திட்டம், எதிர்காலத்தில் மேலும் விரிவடையலாம் என்ற எதிர்பார்ப்பும் திரையுலக வட்டாரத்தில் நிலவுகிறது.