நடிகை ராதிகா சரத்குமார் மையக் கதாபாத்திரமாக நடித்துள்ள தாய் கிழவி திரைப்படத்தின் டிரெய்லர் வெளியாகி இணையத்தில் பேசுபொருளாகியுள்ளது. முதிய பெண்ணின் வாழ்க்கையை நகைச்சுவைத் தோரணையில் சொல்லும் வகையில் காட்சிகள் வடிவமைக்கப்பட்டுள்ளன.

இந்த படத்தை சிவக்குமார் முருகேசன் இயக்கியுள்ளார். தயாரிப்பை நடிகர் சிவகார்த்திகேயன் மேற்கொண்டுள்ளார். ராதிகாவுடன் சிங்கம் புலி, அருள்தாஸ், பால சரவணன், முனிஷ்காந்த், இளவரசு உள்ளிட்ட பலர் நடித்துள்ளனர்.

டிரெய்லரில் என்ன உள்ளது?

‘பவுனுத்தாயி’ என்ற மூதாட்டி கதாபாத்திரத்தில் ராதிகா தோன்றுகிறார். உணவருந்திக் கொண்டிருக்கும் நேரத்தில் குடும்பத்தினர் சொத்து பங்கீடு குறித்து கேட்கும் காட்சியுடன் டிரெய்லர் தொடங்குகிறது. அதன்பின், அவரின் உடல்நிலை திடீரென பாதிக்கப்படுவது, படுக்கையிலேயே இருப்பது போன்ற காட்சிகள் வேகமாக நகர்கின்றன.

ஒரு கட்டத்தில் அவர் உயிரிழந்தாரா அல்லது இன்னும் உயிருடன் உள்ளாரா என்ற குழப்பத்தை ஏற்படுத்தும் வகையில் காட்சிகள் அமைக்கப்பட்டுள்ளன. சொத்தை கைப்பற்ற ஆவலாக இருக்கும் உறவினர்களும், அவர்களை தன்னுடைய விதத்தில் சமாளிக்கும் பவுனுத்தாயியும் இணைந்து கதையை நகைச்சுவை சாயலில் முன்னெடுக்கின்றனர்.

டிரெய்லரின் இறுதியில் மருத்துவமனை காட்சியில் காப்பீடு தொடர்பான கேள்விகள் எழுப்பப்படும் போது, பல அரசியல் சின்னங்கள் மற்றும் பதவிகளை குறிப்பதுபோன்ற வசனங்கள் இடம்பெறுகின்றன. குறிப்பாக “தவெக 18வது வார்டு செயலாளர்” என்ற வசனம் கவனம் ஈர்த்துள்ளது.

வெளியீட்டு தேதி

தாய் கிழவி திரைப்படம் பிப்ரவரி 27ஆம் தேதி திரையரங்குகளில் வெளியாக உள்ளது. டிரெய்லர் வெளியாகியவுடன் ரசிகர்கள் சமூக வலைதளங்களில் ஆதரவு கருத்துகளை பதிவிட்டு வரவேற்றுள்ளனர்.

இந்த படைப்பு குடும்ப உறவுகள், சொத்து பிரச்சினைகள் மற்றும் சமூக நையாண்டியை இணைத்து அமைந்த நகைச்சுவை படமாக உருவாகியிருப்பது டிரெய்லரின் மூலம் தெரிய வருகிறது.