இலங்கையின் வடக்கு மாகாணத்தில் உள்ள வவுனியா மற்றும் முல்லைத்தீவு மாவட்டங்களில் முன்மொழியப்பட்டுள்ள கிவுல் ஓயா நீர்பாசன மற்றும் நீர்த்தேக்கத் திட்டம், தற்போது தமிழர் அரசியல் கட்சிகள், உள்ளாட்சி பிரதிநிதிகள் மற்றும் சமூக செயற்பாட்டாளர்களின் கடும் எதிர்ப்பை எதிர்கொண்டு வருகிறது. இந்தத் திட்டம் அபிவிருத்திக்கானதா, அல்லது இன அடிப்படையிலான குடியேற்ற முயற்சியா என்ற கேள்வி இன்று பரவலாக எழுந்துள்ளது.
வவுனியா மாவட்டத்தில் அமைந்துள்ள மா ஓயாவின் முக்கிய துணைநதியான கிவுல் ஓயாவை குறுக்காக அணை கட்டி, புதிய நீர்த்தேக்கத்தை உருவாக்குவதையே இந்தத் திட்டம் நோக்கமாகக் கொண்டுள்ளது.
இதன் மூலம்,
1,700 ஹெக்டேர் புதிய நிலங்களுக்கு நீர்ப்பாசன வசதி
ஏற்கனவே பயிரிடப்படும் 700 ஹெக்டேர் நிலங்களின் உற்பத்தித் திறன் மேம்பாடு
என திட்ட அறிக்கைகள் குறிப்பிடுகின்றன.
2011ஆம் ஆண்டு முன்வைக்கப்பட்ட இந்தத் திட்டம் பல்வேறு காரணங்களால் செயல்படுத்தப்படாமல் இருந்த நிலையில், தற்போது தேசிய மக்கள் சக்தி அரசாங்கம் இதனை மீண்டும் முன்னெடுக்க முடிவு செய்துள்ளது.
2026 ஜனவரி 19 அன்று நடைபெற்ற அமைச்சரவைக் கூட்டத்தில் இதற்கான அனுமதியும் வழங்கப்பட்டுள்ளது.
தமிழ் அரசியல் பிரதிநிதிகள் முன்வைக்கும் முக்கிய குற்றச்சாட்டு என்னவெனில்,
இந்தத் திட்டம் தமிழர்களின் விவசாயத் தேவைகளுக்காக அல்ல, மாறாக முன்னர் குடியமர்த்தப்பட்ட சிங்கள மக்களின் நீர்த் தேவையை பூர்த்தி செய்வதற்காக வடிவமைக்கப்பட்டதாகும்.
1983ஆம் ஆண்டு காலகட்டத்தில் வவுனியா, முல்லைத்தீவு பகுதிகளில் குடியமர்த்தப்பட்ட சிங்கள மக்களின் விவசாய நிலங்களுக்கும், அவர்களது அன்றாட வாழ்க்கைத் தேவைகளுக்கும் நீர் வழங்கும் நோக்கத்துடன் இந்தத் திட்டம் உருவாக்கப்பட்டதாக தமிழர் தரப்பு குற்றம்சாட்டுகிறது.
இலங்கை தமிழரசு கட்சியின் நாடாளுமன்ற உறுப்பினர் பத்மநாதன் சத்தியலிங்கம்,
தமிழ் மக்கள் பல தசாப்தங்களாக வாழ்ந்த பாரம்பரிய நிலங்கள் இன்னும் முழுமையாக விடுவிக்கப்படாத நிலையில், புதிய திட்டங்களுக்காக காடுகள் விரைவாக ஒதுக்கப்படுவது கேள்விக்குரியதாக உள்ளது என கூறுகிறார்.
“வன்னி பகுதிகளில் யுத்தத்துக்குப் பிறகு மீள்குடியேற விரும்பும் தமிழர்களுக்கு இன்னும் அனுமதி மறுக்கப்படுகிறது. ஆனால், அதே நிலங்கள் கிவுல் ஓயா திட்டத்திற்காக சுலபமாக விடுவிக்கப்படுகின்றன” என அவர் தெரிவிக்கிறார்.
2014ஆம் ஆண்டு வெளியிடப்பட்ட விசேட வர்த்தமானியின் மூலம், பல தமிழ் கிராமங்கள் மற்றும் விவசாய நிலங்கள் வனவளத் திணைக்களத்திற்குள் கொண்டு வரப்பட்டதாகவும், இதனால் தமிழர்கள் மீண்டும் குடியேற முடியாத நிலை ஏற்பட்டுள்ளதாகவும் அவர் சுட்டிக்காட்டுகிறார்.
இந்தத் திட்டத்தின் பின்னணியில் புதிய சிங்கள குடியேற்றங்களை உருவாக்கும் முயற்சி இருக்கிறதா? என்ற சந்தேகம் பலரிடமும் எழுந்துள்ளது.
வவுனியா வடக்கு பிரதேச சபையின் தவிசாளர் கிருஸ்ணவேணி திருநாவுகரசு,
இந்தத் திட்டம் தமிழர்களின் பூர்வீகப் பகுதிகளில் இனப்பரம்பலை மாற்றும் அபாயத்தை ஏற்படுத்தும் என எச்சரிக்கிறார்.
“அபிவிருத்தி என்ற பெயரில் எங்கள் நிலங்களில் மக்கள் அமைப்பை மாற்றும் முயற்சி தெளிவாக தெரிகிறது. இது நிறுத்தப்பட வேண்டும்” என அவர் கூறுகிறார்.
முல்லைத்தீவு மாவட்ட நாடாளுமன்ற உறுப்பினர் ரவிகரன்,
அபிவிருத்தியை மறுப்பதில்லை என்றாலும்,
“தமிழர்களின் இருப்பையே பாதிக்கும் அபிவிருத்தி என்றால் அதனை ஏற்க முடியாது”
எனத் தெரிவிக்கிறார்.
“சிங்கள மக்களுக்கு எதிராக இல்லை. ஆனால், திட்டமிட்ட குடியேற்ற முயற்சிகளுக்கு எதிராகத்தான் எங்கள் போராட்டம்” என அவர் வலியுறுத்துகிறார்.
சமூக செயற்பாட்டாளர் மாணிக்கம் ஜெகன்,
இந்தத் திட்டத்திற்காக காடுகள் அழிக்கப்படுமானால், யானை – மனித மோதல்கள் அதிகரிக்கும் அபாயம் இருப்பதாக எச்சரிக்கிறார்.
வன்னி பகுதிகளில் ஏற்கனவே யானை தாக்குதல்களால் உயிரிழப்புகள் நிகழ்ந்து வரும் நிலையில், புதிய காடழிப்புகள் நிலைமையை மேலும் மோசமாக்கும் என அவர் கூறுகிறார்.
அமைச்சர் இராமலிங்கம் சந்திரசேகர்,
கிவுல் ஓயா திட்டம் குறித்து முன்வைக்கப்படும் இன அரசியல் குற்றச்சாட்டுகளை முழுமையாக மறுத்துள்ளார்.
“இந்தத் திட்டம் எந்த இனத்திற்கும் எதிரானது அல்ல. சட்டத்திற்கு புறம்பான நில கையகப்படுத்தல் எதுவும் நடைபெறாது. அனைத்து சமூகங்களின் உரிமைகளும் பாதுகாக்கப்படும்” என அவர் தெரிவித்துள்ளார்.
மேலும், வறட்சியால் பாதிக்கப்பட்ட பகுதிகளில் விவசாய உற்பத்தியை உயர்த்தவும், ஆயிரக்கணக்கான குடும்பங்களுக்கு நிலையான நீர்ப்பாசன வசதி வழங்குவதுமே திட்டத்தின் நோக்கம் என அரசு தரப்பு விளக்கம் அளித்துள்ளது.
கிவுல் ஓயா திட்டம் அபிவிருத்தி – அரசியல் – சுற்றுச்சூழல் – இன உரிமை என்ற பல பரிமாணங்களில் விவாதத்தை உருவாக்கியுள்ளது.
இந்தத் திட்டம் உண்மையில் யாருக்காக, யாரை பாதிக்கிறது என்பதே இப்போது வடக்கு இலங்கையின் முக்கிய அரசியல் கேள்வியாக மாறியுள்ளது.
தமிழக வெற்றிக் கழகத்திற்கு ‘விசில்’ சின்னம் – தேர்தல் ஆணையம் அதிகாரப்பூர்வ ஒப்புதல் தமிழக அரசியல் களத்தில் புதிய அத்தியாயத்தை தொடங்கியுள்ள நடிகர் விஜய்யின் தமிழக வெற்றிக் கழகம் (TVK), தனது முதல் சட்டமன்றத் தேர்தலை எதிர்கொள்ள தயாராகி வருகிறது. 2026 ஆம் ஆண்டு நடைபெற உள்ள தமிழ்நாடு சட்டமன்றத் தேர்தலை முன்னிட்டு, அக்கட்சி கோரியிருந்த ‘விசில்’ சின்னத்தை இந்திய தேர்தல் ஆணையம் அதிகாரப்பூர்வமாக ஒதுக்கியுள்ளது. தமிழக வெற்றிக் கழகம் தற்போது பதிவு செய்யப்பட்டிருந்தாலும், இன்னும் அங்கீகாரம் பெறாத கட்சியாகும். இருப்பினும், மாநிலம் முழுவதும் உள்ள 234 தொகுதிகளிலும் ஒரே சின்னத்தில் போட்டியிடும் வகையில், தேர்தல் ஆணையம் பொதுச் சின்னம் வழங்கியுள்ளது. தேர்தல் ஆணையத்திடம் கட்சி சார்பில் சமர்ப்பிக்கப்பட்ட 10 விருப்பச் சின்னங்களில் ‘விசில்’ முதலிடத்தில் இடம்பெற்றிருந்தது. கட்சித் தலைவர் விஜய் விரும்பிய சின்னமே ஒதுக்கப்பட்டுள்ளதால், கட்சித் தொண்டர்கள் மற்றும் ஆதரவாளர்கள் மத்தியில் பெரும் உற்சாகம் ஏற்பட்டுள்ளது. ஒரு புதிய அரசியல் கட்சிக்கு மாநில அளவில் ஒரே சின்னம் வழங்கப்படுவது, அந்தக் கட்சியின் அடையாளத்தை பொதுமக்களிடம் விரைவாக கொண்டு செல்ல உதவும் முக்கிய அம்சமாகக் கருதப்படுகிறது. ‘விசில்’ சின்னம் எச்சரிக்கை, விழிப்புணர்வு மற்றும் மாற்றத்தைக் குறிக்கும் அடையாளமாக பார்க்கப்படுகிறது. ஊழலுக்கு எதிரான குரல் அல்லது புதிய அரசியல் தொடக்கத்தின் குறியீடாக இதனை த.வெ.க. பயன்படுத்தும் வாய்ப்பும் உள்ளது. இதுகுறித்து கட்சியின் தகவல் தொழில்நுட்பப் பிரிவு நிர்வாகி சி.டி.ஆர். நிர்மல் குமார் கூறுகையில், “எங்கள் தலைவர் விரும்பிய விசில் சின்னமே கிடைத்துள்ளது. இது கட்சியின் அரசியல் பயணத்தில் ஒரு முக்கிய ஆரம்ப கட்டமாகும்” எனத் தெரிவித்துள்ளார். இதனிடையே, நடிகர் கமல்ஹாசன் தலைமையிலான மக்கள் நீதி மய்யம் கட்சிக்கும், அவர்கள் பயன்படுத்தி வந்த ‘டார்ச் லைட்’ சின்னம் பொதுச் சின்னமாக மீண்டும் ஒதுக்கப்பட்டுள்ளது. இதன் மூலம் 2026 சட்டமன்றத் தேர்தலை முன்னிட்டு, அரசியல் கட்சிகளின் பிரச்சாரமும் சின்னங்களும் இப்போதே கவனம் பெறத் தொடங்கியுள்ளன.
2026-ல் முழுமையாக அப்டேட் ஆகும் ஐபோன்கள்… விபரம் என்ன? செயற்கை நுண்ணறிவு (AI) துறையில் உலகளாவிய அளவில் கடும் போட்டி நிலவி வரும் நிலையில், அந்த போட்டியை எதிர்கொள்ள ஆப்பிள் நிறுவனம் ஒரு பெரிய திட்டத்தை தயாரித்து வருவதாக தகவல்கள் வெளியாகியுள்ளன. அதன்படி, 2026-ஆம் ஆண்டு ஆப்பிள் நிறுவனத்திற்கு AI அடிப்படையிலான மிக முக்கியமான திருப்புமுனை ஆண்டாக அமையக்கூடும் என தொழில்நுட்ப வட்டாரங்கள் தெரிவிக்கின்றன. ஏஐ போட்டியில் ஏன் பின்னடைவை சந்தித்த ஆப்பிள்? ஓபன் ஏஐ, கூகுள், மைக்ரோசாப்ட் போன்ற முன்னணி நிறுவனங்கள் 2022 மற்றும் 2023-ஆம் ஆண்டுகளிலேயே ஏஐ துறையில் தீவிரமாக கால்பதித்துவிட்டன. ChatGPT Google Gemini Microsoft Copilot போன்ற ஏஐ சேவைகள் மிக வேகமாக வளர்ச்சி கண்டன. இதற்குப் பின்னணியாக, ஆப்பிள் 2024-ஆம் ஆண்டில்தான் ‘Apple Intelligence’ என்ற தனது ஏஐ தளத்தை அதிகாரப்பூர்வமாக அறிமுகப்படுத்தியது. இதனால், போட்டியாளர்களை விட ஆப்பிள் சற்றே தாமதமாக ஏஐ பயணத்தை தொடங்கியதாக விமர்சனங்கள் எழுந்தன. Apple Intelligence: எதிர்பார்ப்பை பூர்த்தி செய்ததா? Apple Intelligence மூலம், Writing Tools Clean Up (புகைப்படங்களில் தேவையற்ற பொருட்களை நீக்கும் வசதி) On-device AI processing போன்ற அம்சங்கள் அறிமுகப்படுத்தப்பட்டன. ஆனால், கூகுள் ஜெமினி ChatGPT Copilot போன்ற ஏஐ மாடல்களுடன் ஒப்பிடும்போது, ஆப்பிளின் ஏஐ அம்சங்கள் அதே அளவிலான திறனை வழங்கவில்லை என பல தொழில்நுட்ப விமர்சகர்கள் கூறினர். புதுப்பிக்கப்பட்ட Siri – இன்னும் முழுமை பெறவில்லை Apple Intelligence-இன் முக்கிய அங்கமாக கருதப்பட்ட புதுப்பிக்கப்பட்ட Siri, இன்னும் முழுமையான ஏஐ அசிஸ்டென்ட் அனுபவத்தை வழங்கவில்லை என்பதே ஆப்பிள் எதிர்கொள்ளும் பெரிய சவாலாக உள்ளது. இயற்கையான உரையாடல் திறன் கான்டெக்ஸ்ட் புரிதல் ஆப்-டூ-ஆப் செயல்பாடுகள் போன்ற விஷயங்களில் Siri, போட்டியாளர்களை விட பின்தங்கியுள்ளதாக விமர்சனம் செய்யப்படுகிறது. 2026-ல் ஆப்பிளின் ‘மாஸ்டர் பிளான்’ என்ன? தொழில்நுட்ப வட்டார தகவல்களின் படி, 2026-ல்: முழுமையாக ஏஐ-ஆதரவு பெற்ற Siri ஐபோன்களில் ஆழமாக ஒருங்கிணைக்கப்பட்ட Apple Intelligence அதிக சக்தி வாய்ந்த on-device AI processing தனியுரிமையை மையமாகக் கொண்ட ஏஐ அம்சங்கள் அறிமுகப்படுத்தப்படலாம் என கூறப்படுகிறது. இதன் மூலம், AI போட்டியில் ஆப்பிள் தன் இழந்த முன்னிலையை மீட்டெடுக்க திட்டமிட்டு வருவதாக தெரிகிறது. முடிவாக AI உலகில் தாமதமாக நுழைந்தாலும், “சரியான நேரத்தில், சரியான முறையில்” ஒரு பெரிய மாற்றத்தை கொண்டு வருவதே ஆப்பிளின் நீண்டகால யுக்தியாக இருக்கலாம். 2026-ல் அப்டேட் ஆகும் ஐபோன்கள், வெறும் ஹார்ட்வேர் அப்டேட் அல்ல முழுமையான AI அனுபவத்தை வழங்கும் சாதனங்களாக மாறும் என்று எதிர்பார்க்கப்படுகிறது.
டிஜிட்டல் தொழில்நுட்பம் வளர்ந்த இந்த காலகட்டத்தில், அதையே ஆயுதமாக மாற்றி பொதுமக்களை ஏமாற்றும் சைபர் குற்றவாளிகளின் எண்ணிக்கை நாளுக்கு நாள் அதிகரித்து வருகிறது. குறிப்பாக, ‘டிஜிட்டல் அரெஸ்ட்’, ‘ஆன்லைன் விசாரணை’ போன்ற வார்த்தைகளை பயன்படுத்தி, மூத்த குடிமக்களை மனதளவில் மிரட்டி, அவர்கள் வாழ்நாள் சேமிப்பை பறிக்கும் சம்பவங்கள் தொடர்ச்சியாக நடந்து வருகின்றன. மும்பையில் நடந்த சமீபத்திய ஒரு சம்பவம், இந்த மோசடிகள் எந்த அளவுக்கு திட்டமிட்டு நடத்தப்படுகின்றன என்பதைக் காட்டுகிறது. இந்த முறை, சைபர் குற்றவாளிகள் முன்னாள் இந்திய தலைமை நீதிபதி சந்திரசூட்டின் பெயரையே பயன்படுத்தி, ஒரு மூதாட்டியிடமிருந்து சுமார் 3 கோடியே 71 லட்சம் ரூபாயை மோசடியாகப் பறித்துள்ளனர். காவல்துறை மற்றும் சிபிஐ விசாரணை என்ற பெயரில் நடந்த இந்த நாடகத்தில், அந்தப் பெண் பல வாரங்கள் தொடர்ந்து மிரட்டப்பட்டு, மனதளவில் முற்றிலும் கட்டுப்படுத்தப்பட்டதாக போலீஸ் விசாரணையில் தெரியவந்துள்ளது. ஒரு தொலைபேசி அழைப்பில் தொடங்கிய பயம் மும்பையின் அந்தேரி மேற்கு பகுதியில் கடந்த 26 ஆண்டுகளாக வசித்து வரும் அந்த மூதாட்டிக்கு, கடந்த ஆகஸ்ட் 18 அன்று ஒரு மர்ம தொலைபேசி அழைப்பு வந்துள்ளது. “உங்கள் அழைப்பை கொலாபா காவல் நிலையத்துடன் இணைக்கிறேன்” என்று கூறிய அந்த நபர், அழைப்பைத் துண்டித்துள்ளார். சில நிமிடங்களில், அந்தப் பெண்ணுக்கு வாட்ஸ்ஆப்பில் ஒரு வீடியோ கால் வந்துள்ளது. மறுமுனையில் பேசிய நபர், தன்னை காவல் நிலைய அதிகாரி என்று அறிமுகப்படுத்தி, “உங்கள் ஆதார் விவரங்கள் தவறாக பயன்படுத்தப்பட்டுள்ளன. உங்கள் பெயரில் ஒரு வங்கிக் கணக்கு தொடங்கப்பட்டு, அது சட்டவிரோத பணப் பரிமாற்றத்திற்குப் பயன்படுத்தப்படுகிறது” என்று கூறியுள்ளார். இந்த தகவலைக் கேட்ட அந்த மூதாட்டி அதிர்ச்சியடைந்துள்ளார். தனக்கு அப்படி எந்தக் கணக்கும் இல்லை என்றும், தான் எந்தக் குற்றத்திலும் ஈடுபடவில்லை என்றும் அவர் விளக்கம் அளிக்க முயன்றுள்ளார். கைது மிரட்டலும் போலி ஆவணங்களும் அவரின் விளக்கத்தை கேட்காமல், மோசடி நபர்கள் “இந்த வழக்கில் ஏற்கனவே ஒருவர் கைது செய்யப்பட்டுள்ளார். உங்கள் பெயரும் அதில் இருப்பதால், எப்போது வேண்டுமானாலும் நீங்கள் கைது செய்யப்படலாம்” என்று மிரட்டியுள்ளனர். மேலும், இது தொடர்பான போலி கடிதங்களையும், சட்ட ஆவணங்களைப் போல வடிவமைக்கப்பட்ட சில பதிவுகளையும் அவருக்கு அனுப்பியுள்ளனர். “நாங்கள் விசாரணை நடத்துகிறோம். எங்கள் கேள்விகளுக்கு பதில் அளிக்க வேண்டும். இல்லையெனில் உங்கள் வீட்டிற்கு வந்து உங்களையும், உங்கள் குடும்பத்தினரையும் கைது செய்வோம்” என்று அவர்கள் தொடர்ந்து அழுத்தம் கொடுத்துள்ளனர். இந்த விவகாரத்தை யாரிடமும் சொன்னால், அவர்களும் சட்ட நடவடிக்கைக்கு உள்ளாவார்கள் என்றும் எச்சரித்துள்ளனர். இதன் காரணமாக, அந்த மூதாட்டி கடும் பயத்தில் ஆழ்ந்துள்ளார். தனது வங்கிக் கணக்குகள், முதலீடுகள், வீட்டுத் தகவல்கள் என அனைத்தையும் அவர்களிடம் தெரிவிக்கத் தொடங்கியுள்ளார். ‘ஆன்லைன் நீதிமன்றம்’ என்ற நாடகம் ஒரு கட்டத்தில், இந்த வழக்கை சிபிஐ விசாரித்து வருவதாகவும், 24 மணிநேரமும் அவர்களது கண்காணிப்பில் இருக்க வேண்டுமென்றும் கூறியுள்ளனர். விசாரணை நடத்தும் அதிகாரியின் பெயர் எஸ்.கே. ஜெயஸ்வால் என்றும் தெரிவித்துள்ளனர். அதன் பின்னர், அந்தப் பெண்ணிடம் அவரது வாழ்க்கையைப் பற்றி 2 முதல் 3 பக்கங்களுக்கு ஒரு கட்டுரை எழுதச் சொல்லியுள்ளனர். “இது உங்கள் நிரபராதத்தை நிரூபிக்க உதவும்” என்று கூறி, அவருக்கு நம்பிக்கை அளித்துள்ளனர். பின்னர் நடந்தது இன்னும் அதிர்ச்சியளிப்பதாக உள்ளது. வீடியோ காலில் வந்த ஒருவர், தன்னை முன்னாள் தலைமை நீதிபதி சந்திரசூட் என்று அறிமுகப்படுத்திக் கொண்டு, “உங்கள் வழக்கு தீவிரமானது. ஆனால் நீங்கள் நிரபராதி” என்று கூறி, அவரது முதலீட்டு ஆவணங்களை கேட்டுள்ளார். அந்தப் பெண், இது உண்மையான நீதிமன்ற விசாரணை என்றே நம்பியுள்ளார். கணக்குகளை காலி செய்யச் செய்த திட்டம் சிறிது நேரத்தில், “உங்கள் கணக்கில் சைபர் தாக்குதல் நடந்துள்ளது” என்று கூறி, விசாரணையின் ஒரு பகுதியாக அவரது மியூச்சுவல் ஃபண்ட் முதலீடுகளை பணமாக்கச் சொன்னுள்ளனர். பின்னர், அந்த தொகையில் 90 முதல் 95 சதவீதத்தை அவர்கள் கொடுத்த வங்கிக் கணக்கிற்கு தற்காலிகமாக மாற்ற வேண்டும் என்றும் கூறியுள்ளனர். கைது பயத்தில் இருந்த அந்த மூதாட்டி, அவர்கள் சொன்னபடி பணத்தை அனுப்பியுள்ளார். இதற்குப் பிறகு, தொடர்ந்து வெவ்வேறு வங்கிக் கணக்குகளுக்குப் பணம் அனுப்புமாறு மிரட்டல்கள் வந்துள்ளன. ஆகஸ்ட் முதல் அக்டோபர் வரை நடந்த இந்த மோசடியில், மொத்தமாக 3 கோடியே 71 லட்சம் ரூபாய் பறிக்கப்பட்டுள்ளது. பணத்தைத் திரும்பக் கேட்டபோது, ஒவ்வொரு முறையும் புதிய காரணங்களைச் சொல்லி காலம் கடத்தினர். இதன் பின்னர்தான் தான் மோசடியில் சிக்கியிருப்பதை அந்தப் பெண் உணர்ந்துள்ளார். காவல் நிலையத்தில் புகார் – வெளிவந்த உண்மை அக்டோபர் 13 அன்று, அந்த மூதாட்டி காவல் நிலையத்தில் புகார் அளித்துள்ளார். வாட்ஸ்ஆப் உரையாடல்கள், வங்கிப் பரிவர்த்தனை விவரங்கள், ஸ்கிரீன் ஷாட்கள் ஆகியவற்றை காவல்துறையிடம் ஒப்படைத்துள்ளார். இந்த வழக்கில் ஒரு நபர் கைது செய்யப்பட்டுள்ளதாக தகவல்கள் வெளியாகியுள்ளன. இப்படிப்பட்ட அழைப்பு வந்தால் என்ன செய்ய வேண்டும்? காவல்துறையோ, சிபிஐயோ ஒருபோதும் வாட்ஸ்ஆப், வீடியோ கால் அல்லது சமூக ஊடகங்கள் வழியாக விசாரணை நடத்துவதில்லை. கைது செய்வதாக மிரட்டுவதும் இல்லை. அப்படிப்பட்ட அழைப்புகள் வந்தால், எந்தத் தகவலையும் பகிராமல் உடனே அந்த எண்ணைத் துண்டித்து, பிளாக் செய்ய வேண்டும். உயர் அதிகாரிகளின் புகைப்படங்கள், நீதிமன்ற பின்னணி போன்றவை காண்பிக்கப்பட்டாலும், அதனால் நம்ப வேண்டாம். இது ஒரு திட்டமிட்ட நாடகமாக இருக்கலாம். சைபர் மோசடியில் சிக்கினால், உடனடியாக அரசு நடத்தும் சைபர் குற்ற புகார் தளத்தில் அல்லது உள்ளூர் சைபர் காவல் நிலையத்தில் புகார் அளிக்க வேண்டும். தாமதமின்றி புகார் அளித்தால், பணத்தை மீட்டெடுக்கும் வாய்ப்பு அதிகமாக இருக்கும் என நிபுணர்கள் எச்சரிக்கின்றனர்.
ஜீவா நடிப்பில் ‘தலைவர் தம்பி தலைமையில்’ திரைப்படம் இன்று திரையரங்குகளில் வெளியீடு சென்னை: நடிகர் ஜீவா நடிப்பில் உருவாகியுள்ள ‘தலைவர் தம்பி தலைமையில்’ திரைப்படம் இன்று தமிழகம் முழுவதும் திரையரங்குகளில் வெளியாகியுள்ளது. குடும்ப ரசிகர்களை கவரும் வகையில் கதையும் திரைக்கதையும் அமைக்கப்பட்டுள்ளதாக படக்குழு தெரிவித்துள்ளது. ஜீவா, இதற்கு முன்பு ‘ஆசை ஆசையாய்’ திரைப்படத்தின் மூலம் தமிழ் சினிமாவில் நடிகராக அறிமுகமானார். அதன் பின்னர் காமெடி, காதல், ஆக்ஷன் என பல்வேறு கதாபாத்திரங்களில் நடித்துள்ளார். இந்த புதிய படத்தில், சமூகப் பின்னணியுடன் கூடிய முக்கியமான கதாபாத்திரத்தில் அவர் நடித்துள்ளதாக கூறப்படுகிறது. திரைப்படத்தில் அரசியல் மற்றும் குடும்ப உணர்வுகளை மையமாக கொண்டு கதை நகர்வதாக தகவல்கள் வெளியாகியுள்ளன. இயக்கம், இசை மற்றும் நடிகர்களின் நடிப்பு படத்திற்கு முக்கிய பலமாக இருக்கும் என எதிர்பார்க்கப்படுகிறது. இன்று வெளியானதைத் தொடர்ந்து, ரசிகர்கள் மற்றும் விமர்சகர்கள் மத்தியில் படத்திற்கு நல்ல வரவேற்பு கிடைக்குமா என்ற எதிர்பார்ப்பு உருவாகியுள்ளது. முதல் நாள் வசூல் மற்றும் ரசிகர் கருத்துகள் விரைவில் வெளியாகும் என எதிர்பார்க்கப்படுகிறது.
எடை குறைப்பு என்ற பெயரில் நடந்த விபரீதம் – மதுரை மாணவியின் மரணம்; ஆயுஷ், மருந்து கட்டுப்பாட்டு துறை கடும் எச்சரிக்கை மதுரையில் இளம் மாணவி ஒருவர் உயிரிழந்த சம்பவம், சமூக வலைதளங்களில் பரவும் தவறான உடல்நல ஆலோசனைகளின் ஆபத்தை மீண்டும் வெளிச்சத்துக்கு கொண்டு வந்துள்ளது. உடல் எடையை குறைக்க முயன்ற நிலையில், வெங்காரம் என்ற பொருளை உட்கொண்டதால் ஏற்பட்ட உடல்நலக் கோளாறு காரணமாக மாணவி உயிரிழந்ததாக தகவல்கள் தெரிவிக்கின்றன. மதுரை செல்லூர் அருகே உள்ள மீனாம்பாள்புரம் பகுதியைச் சேர்ந்த கலையரசி (19), அரசு உதவி பெறும் மகளிர் கல்லூரியில் இளங்கலை இரண்டாம் ஆண்டு பயின்று வந்தார். சிறுவயதிலிருந்தே உடல் பருமன் இருந்ததால், எடையை குறைக்க வேண்டும் என்ற எண்ணத்தில், யூடியூப் உள்ளிட்ட சமூக வலைதளங்களில் வெளியாகும் வீடியோக்களை அவர் தொடர்ந்து பார்த்து வந்ததாக கூறப்படுகிறது. அந்த வகையில், ஒரு வீடியோவில் கூறப்பட்ட ஆலோசனையை நம்பி, அருகிலுள்ள நாட்டு மருந்துக் கடையில் வாங்கிய வெங்காரத்தை கலையரசி உட்கொண்டுள்ளார். இதன் பின்னர், அவருக்கு வாந்தி, வயிற்றுப்போக்கு உள்ளிட்ட கடுமையான உடல்நல பாதிப்புகள் ஏற்பட்டன. உடனடியாக தனியார் மருத்துவமனையில் அனுமதிக்கப்பட்டு முதலுதவி அளிக்கப்பட்ட பிறகு வீடு திரும்பிய நிலையில், அதே இரவு மீண்டும் உடல்நிலை மோசமடைந்தது. பின்னர் ராஜாஜி அரசு மருத்துவமனைக்கு அழைத்துச் செல்லப்பட்டபோதும், அவரை காப்பாற்ற முடியவில்லை. இந்த சம்பவம் தொடர்பாக செல்லூர் காவல் நிலையத்தில் வழக்குப் பதிவு செய்யப்பட்டு விசாரணை நடைபெற்று வருகிறது. இதனிடையே, சம்பவத்திற்கு காரணமான நாட்டு மருந்துக் கடை மற்றும் சமூக வலைதள சேனல்கள் மீது நடவடிக்கை எடுக்க வேண்டும் என்ற கோரிக்கைகள் எழுந்துள்ளன. இந்த விவகாரம் குறித்து ஆயுஷ் மருந்து கட்டுப்பாட்டு இயக்ககம் பொதுமக்களுக்கு முக்கிய எச்சரிக்கையை விடுத்துள்ளது. சமூக வலைதளங்களில் பரவும் பாரம்பரிய மருத்துவ குறிப்புகள், எடை குறைப்பு டிப்ஸ் போன்றவற்றை மருத்துவர் ஆலோசனை இல்லாமல் பின்பற்ற வேண்டாம் என அறிவுறுத்தப்பட்டுள்ளது. முகவரி, பதிவு விவரம் இல்லாத விளம்பரங்களை நம்புவது ஆபத்தானது என்றும் தெரிவிக்கப்பட்டுள்ளது. ஆயுஷ் துறை அதிகாரிகள் கூறுகையில், “சமூக வலைதளங்களில் போலி முகவரி, தொடர்பு விவரம் இல்லாத விளம்பரங்கள் அதிகரித்து வருகின்றன. இதனால் நடவடிக்கை எடுப்பது சவாலாக உள்ளது. பொதுமக்கள் இதுபோன்ற தகவல்களை நம்பாமல், அரசு மருத்துவமனைகள் அல்லது ஆரம்ப சுகாதார நிலையங்களில் உள்ள அங்கீகரிக்கப்பட்ட சித்த மருத்துவர்களிடம் ஆலோசனை பெற வேண்டும்” என தெரிவித்துள்ளனர். எடை குறைப்பு, ஆண்மை குறைபாடு உள்ளிட்ட பிரச்சனைகளை முன்வைத்து சமூக வலைதளங்களில் தொடர்ந்து பரவும் விளம்பரங்கள், குறிப்பாக இளைஞர்கள் மத்தியில் தவறான புரிதலை உருவாக்கக்கூடும் என சுகாதார நிபுணர்கள் எச்சரிக்கின்றனர். கலையரசியின் மரணம், இந்த ஆபத்துகளை உணர்த்தும் ஒரு துயரமான எடுத்துக்காட்டாக பார்க்கப்படுகிறது.
தமிழக அரசியல் சூழல் சூடுபிடித்துள்ள நிலையில், Vijay தலைமையிலான Tamilaga Vettri Kazhagam கட்சியின் நிர்வாகிகள் கூட்டம் தஞ்சாவூரில் நடைபெற்றது. சேலம் மற்றும் வேலூர் கூட்டங்களைத் தொடர்ந்து நடைபெற்ற இந்த நிகழ்ச்சியில் விஜய் பச்சைத் துண்டு அணிந்து கலந்து கொண்டு உரையாற்றினார். தனது பேச்சில் தற்போதைய அரசியல் சூழலை கடுமையாக விமர்சித்ததுடன், கட்சியின் எதிர்கால திட்டங்களையும் அவர் வெளிப்படுத்தினார். “தமிழ்நாடு தான் தவெக” கூட்டத்தில் பேசும்போது விஜய், “தமிழ்நாடு தான் தவெக; தவெக தான் தமிழ்நாடு. எனக்கும் தமிழக மக்களுக்கும் இடையில் யாராலும் வர முடியாது” எனக் குறிப்பிட்டார். அதே நேரத்தில், தற்போதைய அரசியல் போட்டியை சுட்டிக்காட்டிய அவர், M. K. Stalin கூறும் அரசியல் விமர்சனங்களுக்கு பதிலளித்தார். “மீண்டும் ஆட்சிக்கு வருவோம் என்று அவர்கள் கூறுகிறார்கள். ஆனால், வரலாற்றில் திமுக இரண்டாவது முறையாக ஆட்சியைப் பிடித்தது கிடையாது. அது அவர்களின் முன்னாள் தலைவர் M. Karunanidhi காலத்தில்கூட நடைபெறவில்லை” என்று அவர் விமர்சித்தார். நீட், தண்ணீர் பிரச்சனை குறித்து விமர்சனம் தமிழ்நாட்டில் நீர் வளம் குறித்த பிரச்சனைகளைப் பற்றி பேசும் போது விஜய், சமீபத்தில் படித்த ஒரு கட்டுரை தன்னை அதிர்ச்சியடைய வைத்ததாக தெரிவித்தார். “விவசாயம் பற்றி எனக்கு முழுமையாக தெரியாது என்பதை நான் ஒப்புக்கொள்கிறேன். ஆனால் விவசாயிகள் எதிர்கொள்ளும் சிரமங்கள் குறித்து எனக்குத் தெரியும். அடுத்த பிறவி இருந்தால் விவசாயிகளுக்கு மகனாக பிறக்க ஆசைப்படுகிறேன்” என்று அவர் கூறினார். மேலும் மலை வெட்டுதல், மணல் மற்றும் கனிம வள கொள்ளைகள் ஆகியவற்றுக்கு தற்போதைய ஆட்சி அனுமதி அளிக்கிறது என்றும் அவர் குற்றம்சாட்டினார். “மீனவர்கள் பாதுகாப்பு உறுதி செய்யப்படும்” மீனவர்கள் பிரச்சனை குறித்தும் விஜய் கருத்து தெரிவித்தார். மத்திய அரசுக்கு கடிதம் எழுதுவது மட்டுமே தீர்வாக இருக்க முடியாது என்றும், கட்சியின் ஆட்சி வந்தால் மத்திய அரசிடம் உரிய அழுத்தம் கொடுத்து தமிழக மீனவர்களின் பாதுகாப்பை உறுதி செய்வோம் என்றும் அவர் தெரிவித்தார். தேர்தல் வாக்குறுதிகள் உரையின் இறுதியில் விஜய் சில முக்கிய வாக்குறுதிகளையும் அறிவித்தார். அவை: 5 ஏக்கர் வரை நிலம் வைத்துள்ள விவசாயிகளுக்கு பயிர் கடன் தள்ளுபடி 2 ஏக்கர் அல்லது நிலமற்ற விவசாயத் தொழிலாளர்களின் குழந்தைகளுக்கு இலவச தொழிற்கல்வி 500 குடும்ப அட்டைகளுக்கு ஒரு ரேசன் கடை அமைப்பு ரேசன் கடைகளில் அரிசியைத் தவிர மற்ற பொருட்களை பேக் செய்து வழங்கும் திட்டம் விவசாயத்திற்கு தேவையான உரங்கள் தட்டுப்பாடு இல்லாமல் வழங்க நடவடிக்கை “இது வெறும் தேர்தல் அல்ல” உரையின் முடிவில் விஜய், இந்த தேர்தல் அரசியல் கட்சிகளுக்கு சாதாரண தேர்தலாக இருக்கலாம். ஆனால் தன்னை நேசிக்கும் மக்களுக்கு இது ஒரு உணர்ச்சி சார்ந்த போராட்டம் என்று கூறினார். ஊழல் இல்லாத ஆட்சி மற்றும் உண்மையான சமூக நீதியை நிலைநாட்டுவதற்காக தான் அரசியலில் களம் இறங்கியுள்ளதாகவும் அவர் வலியுறுத்தினார்.
Coimbatore மாவட்டம் நீலாம்பூர் அருகே உள்ள திறந்தவெளி மைதானத்தில், Dravida Munnetra Kazhagam (திமுக) மேற்கு மண்டல பாக (பூத்) முகவர்கள் மாநாடு இன்று நடைபெறுகிறது. இந்த மாநாட்டில் முதல்வரும், திமுக தலைவருமான M. K. Stalin கலந்து கொண்டு உரையாற்றுகிறார். தேர்தல் முன் தீவிர இயக்கம் தமிழக சட்டப்பேரவைத் தேர்தல் நெருங்கிக் கொண்டிருக்கும் நிலையில், ஆளும் திமுக மீண்டும் ஆட்சியை தக்கவைக்கும் நோக்கில் மண்டல வாரியாக வாக்குச்சாவடி முகவர்கள் மாநாடுகளை நடத்தி வருகிறது. அண்மையில் மதுரையில் தென் மண்டல மாநாடு நடைபெற்றது தற்போது கோவையில் மேற்கு மண்டல மாநாடு இந்த மாநாடுகளில் முதல்வர் நேரடியாக கலந்து கொண்டு, வாக்குச்சாவடி நிலை நிர்வாகம், வாக்காளர் தொடர்பு மற்றும் தேர்தல் ஆயத்தம் குறித்து ஆலோசனைகள் வழங்கி வருகிறார். 6 மாவட்டங்களைச் சேர்ந்த 1.5 லட்சம் முகவர்கள் இந்த மேற்கு மண்டல மாநாட்டில்: 6 மாவட்டங்களைச் சேர்ந்த 1.50 லட்சத்துக்கும் மேற்பட்ட வாக்குச்சாவடி முகவர்கள் கலந்துகொள்ள உள்ளனர். மாநாட்டிற்கு திமுக மேற்கு மண்டல பொறுப்பாளர் Senthil Balaji தலைமை தாங்குகிறார். நிகழ்ச்சி நிரல் காலை 11 மணியளவில் முதல்வர் கோவை வருகை அரசு நிகழ்ச்சிகளில் பங்கேற்பு மாலை 4 மணிக்கு மாநாட்டில் உரை பாதுகாப்பு மற்றும் ஏற்பாடுகள் மாநாட்டிற்காக: குடிநீர் கழிவறை வசதி விரிவான இருக்கை ஏற்பாடுகள் செய்யப்பட்டுள்ளன. மேலும், 1,300-க்கும் மேற்பட்ட காவல்துறையினர் பாதுகாப்பு பணியில் ஈடுபட உள்ளனர். இந்த மாநாடு, தேர்தலை முன்னிட்டு திமுகவின் அமைப்பு வலிமையையும், மண்டல அடிப்படையிலான தளத்திலான பணியையும் வெளிப்படுத்தும் முக்கிய நிகழ்வாகக் கருதப்படுகிறது.
தமிழ்நாட்டில் S.I.R செயல்முறைக்கு பின் வெளியான இறுதி வாக்காளர் பட்டியல் முக்கிய அரசியல் விவாதமாகியுள்ளது. மொத்தமாக 74,07,207 பேர் பட்டியலில் இருந்து நீக்கப்பட்டுள்ளதாக தெரிவிக்கப்படுகிறது. தொகுதிவாரியாகப் பார்க்கும்போது, 103 சட்டமன்ற தொகுதிகளில் வாக்காளர் எண்ணிக்கை 10 சதவீதத்திற்கும் அதிகமாக குறைந்துள்ளது. அதிக நீக்கம் காணப்பட்ட பகுதிகள் கணிசமான அம்சமாக, 26 தொகுதிகளில் 25 சதவீதத்திற்கும் மேலான வாக்காளர் பெயர்கள் நீக்கப்பட்டுள்ளன. மாவட்ட அளவில் சென்னை முதலிடத்தில் உள்ளது. அதிக நீக்கங்கள் பதிவான முதல் 9 இடங்களிலும் சென்னை தொகுதிகளே இடம்பெற்றுள்ளன. குறிப்பாக ஆயிரம் விளக்கு தொகுதியில் சுமார் 35.4% வரை வாக்காளர்கள் பட்டியலில் இருந்து நீக்கப்பட்டுள்ளதாக கூறப்படுகிறது. மாறாக, அரியலூர் மற்றும் ஜெயங்கொண்டம் போன்ற சில தொகுதிகளில் 2 சதவீதத்திற்கும் குறைவான நீக்கங்களே பதிவாகியுள்ளன. தேர்தல் கணக்கில் இதன் அர்த்தம் என்ன? 10 சதவீதத்திற்கும் மேலான வாக்காளர் குறைவு, 2026 தேர்தல் முடிவுகளை பாதிக்கக்கூடும் என அரசியல் ஆய்வாளர்கள் கருதுகின்றனர். காரணம், 2021 சட்டமன்ற தேர்தலில் 122 தொகுதிகளில் 10% மற்றும் அதற்கும் குறைவான வாக்கு வித்தியாசமே வெற்றி–தோல்வியை நிர்ணயித்தது. அதில் 8 தொகுதிகளில் ஆயிரத்திற்கும் குறைவான வாக்கு வித்தியாசம் இருந்தது. இந்த நிலையில், நீக்கப்பட்டவர்களில் தகுதியான வாக்காளர்கள் இடம்பெற்றிருந்தால், அவர்கள் ஆதரித்த கட்சிக்கு நேரடி தாக்கம் ஏற்படும் வாய்ப்பு இருக்கிறது. சமூக வலைதளங்களில் பலர் “என் வாக்கு பட்டியலில் இல்லை” என பதிவிட்டுள்ளதாலும், தரவுகள் குறித்து மேலதிக விளக்கம் தேவைப்படுவதாக அரசியல் வட்டாரங்கள் கூறுகின்றன. அரசியல் தாக்கம் – யாருக்கு சாதகம்? நகர்ப்புறங்களில் அதிக நீக்கம்: நகர வாக்கு சதவீதத்தில் மாற்றம் குறைந்த வித்தியாசத்தில் வென்ற தொகுதிகள்: மீண்டும் கடும் போட்டி ஆதரவாளர் அடிப்படையில் மாறும் சமநிலை மொத்தத்தில், வாக்காளர் பட்டியல் மாற்றம் என்பது வெறும் நிர்வாக நடவடிக்கை மட்டுமல்ல; தேர்தல் முடிவுகளை மாற்றக்கூடிய காரணி ஆகவும் அமையலாம். 2026 தேர்தலை முன்னிட்டு, இந்த விவகாரம் அரசியல் சூழலை மேலும் தீவிரப்படுத்தும் என எதிர்பார்க்கப்படுகிறது.
