உத்தரப்பிரதேசத்தின் ஷாஜகான்பூரில் ஹோலி விழாவை முன்னிட்டு, ஊர்வலப் பாதையில் உள்ள பல தர்காக்கள் மற்றும் மசூதிகள் தற்காலிகமாக தார்பாய் கொண்டு மூடப்பட்டுள்ளன. பாதுகாப்பு மற்றும் முன்னெச்சரிக்கை நடவடிக்கையாக மாவட்ட நிர்வாகம் இந்த ஏற்பாட்டை செய்துள்ளது.

‘ஜூடா மார் ஹோலி’ – பாரம்பரிய நிகழ்வு

ஷாஜகான்பூரில் பல நூற்றாண்டுகளாக நடைபெற்று வரும் ‘ஜூடா மார் ஹோலி’ என்ற பாரம்பரிய நிகழ்வு, ஹோலி நாளில் சிறப்பு அம்சமாகக் கருதப்படுகிறது. இந்த நிகழ்வில், பிரிட்டிஷ் கால அதிகாரியை ஒத்த உடை அணிந்த ஒருவர் எருமை வண்டியில் ஊர்வலமாக வருவார். அதனைத் தொடர்ந்து, பொதுமக்கள் வண்ணப் பொடிகளுடன் கொண்டாடிக்கொண்டே அவர்மீது காலணிகளை எறியும் நிகழ்வு நடைபெறும்.

இந்த ஊர்வலம் செல்லும் பாதையில் அமைந்துள்ள 48 தர்காக்கள் மற்றும் மசூதிகள் மீது வண்ணப்பொடி அல்லது பிற பொருட்கள் விழாமல் இருக்க முன்னெச்சரிக்கையாக தார்பாய் மூடுதல் செய்யப்பட்டுள்ளதாக தெரிவிக்கப்பட்டுள்ளது.

பாதுகாப்பு அதிகரிப்பு

மாவட்ட காவல் கண்காணிப்பாளர் திவேதி அளித்த தகவலின்படி, கடந்த ஆண்டை விட இந்த ஆண்டு பாதுகாப்பு ஏற்பாடுகள் மேலும் வலுப்படுத்தப்பட்டுள்ளன. கூடுதல் போலீஸ் பணியாளர்கள் நியமிக்கப்பட்டதுடன், முக்கிய பகுதிகளில் கண்காணிப்பு தீவிரப்படுத்தப்பட்டுள்ளது.

ஹோலி விழாவை அமைதியாகக் கொண்டாடுமாறு பொதுமக்களுக்கு அறிவுறுத்தப்பட்டுள்ளதுடன், ஊர்வலத்திற்கு இடையூறு விளைவிக்கும் எந்த முயற்சிக்கும் கடுமையான நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.

மத நல்லிணக்கத்தை பேணும் வகையில் இந்த ஏற்பாடுகள் செய்யப்பட்டுள்ளதாக அதிகாரிகள் தெரிவித்துள்ளனர்.